Projekti për ndërtimin e një landfilli në Bradashesh të Elbasanit ka ngritur në protestë banorët e kësaj komune. <br /><br />Sipas korrespodentit Andi Qosja, banorët kanë protestuar për ndalimin e mbetjeve urbane, pasi bashkia e Elbasanit ka miratuar projektin për ndërtimin e një landfilli në këtë fshat. <br /><br />Ata shprehen të shqetësuar për dëmet që mund të sjellë ky landfill.<br /><br />"Kemi 40 vite që ndotemi nga metalurgjiku dhe në rast se vijnë edhe mbetjet, jemi të vdekur!", janë shprehur banorët e Bradasheshit. <br /><br />Me qindra qytetarë me pankarta në duar kanë kundërshtuar miratimin e qeverisë Shqiptare për ndërtimin e landfillit në Dampën e Metalurgjisë.<br /><br />Komuna e Bradasheshit ka rreth 15 mijë banorë dhe është një ndër komununat më të mëdha në vend.<br /><br />Sipas banorëve, "kjo protestë bëhet për të vetmin qëllim, për vazhdimësinë e jetës së fëmijëve të tyre në një ambient të pastër dhe pa ndotje".<br /><br />Ata kanë theksuar se janë kundër projektit të bashkisë Elbasan, që mbështetet dhe nga Qeveria Rama.<br /><br />Projekti, sipas Bashkisë pritet të nisë nga zbatimi në 2-3 muajt e ardhshëm.<br /><br /> Një ndër përkrahësit të protestës ishte edhe kryetari i komunës, Sabri Sollaku i cili theksoi se, "është e padrejtë që ky komunitet të ndëshkohet në këtë mënyrë. Qeveria nuk e ka ditur se pranë dampës së Metalurgjisë ndodhet edhe dampa e Paprit dhe për këtë arsye ne i bëjmë me dije se ndërtimi i landfillit në Papër do të ishte zgjidhja ideale". " Është e padrejtë që këta njerëz të vazhdojnë të vuajnë me sëmundjet kancerogjene prej dekadash me radhë dhe ardhja e mbetjeve urbane do ta shpallte zyrtarisht Bradasheshin si komunën e kancerit", shprehet Sollaku.<br /><br />Banorët e Bradasheshit kanë bërë një peticion i cili i drejtohet Presidentit, Kryeministrit dhe të gjithë përfaqësive të ambasadave të huaja në vend, që ky projekt të mos zbatohet në komunën e tyre. <br /><br />"Në rast se nuk do të merren parasysh kërkesat tona si komunitet, ne do të bllokojmë rrugën nacionale, që lidh Elbasanin me Tiranën", shprehen ata.<br /><br />Banorët propozojnë që të ndërtohet në komunën Papër një landfill rajonal për të gjithë qarkun, pasi ky fshat ka më pak banorë dhe është më pranë lumit.<br /><br />Ndërkohë, një tjetër shqetësim është edhe moslargimi i mbetjeve të cianurit në fshatin Balëz, i cili është shpallur nga qeveria shqiptare si një zonë hot-spot.
