(Pamje nga spitali i Kavajë ku mbërritën disa prej të burgosurve të asfiksuar). Shpërthimi i një bombole gazi është bërë shkak për përfshirjen nga flakët të ambienteve të brendshme të burgut të Rrogozhinës. Zjarri fillimisht ka përfshirë dhomën ku të burgosurit zhvillojnë takimet me familjarët.<br /><br />Si pasojë e zjarrit që përfshiu ambientet e burgut rreth orës 20:30, 17 të dënuar kanë pësuar asfiksim, ndërsa mësohet se 16 prej tyre ndodhen jashtë rrezikut për jetën, ndërsa një i dënuar 27-vjeçar, Marios Habili si pasojë e djegieve që ka pësuar është nisur drejt spitalit të Tiranës, për mjekim më të specializuar.<br /><br />Marios Habili është i dënuar me 5 vjet burg për trafikim të lëndëve narkotike, ndërsa mësohet se i kishin mbetur dhe 2 vjet burg për të shlyer.<br /><br />Burime për "A1 Report" konfirmojnë se 8 të burgosur ndodhen tashmë në spitalin e Rrogozhinës si pasojë e asfiksimit, 7 në spitalin e Kavajës, ndërsa një i dënuar ndodhet në spitalin e Durrësit.<br /><br />I kontaktuar nga "A1 Report" drejtori i Spitalit të Kavajës, Agron Beu tha se të dënuarit që u paraqitën në ambientet e këtij spitali paraqesin kryesisht probleme respiratore, ndërsa njëri prej tyre, i cili kishte pësuar djegie u nis drejt Tiranës.<br /><br />Në vendin e ngjarjes mësohet se kanë mbërritur zjarrfikëse nga Tirana dhe Kavaja, dhe mësohet se tashmë janë neutralizuar flakët e zjarrit dhe situata është vënë nën kontroll.<br /><br />Ndërkaq, në ambientet e burgut u rikthye edhe energjia elektrike, e cila u shkëput si pasojë e zjarrit.<br /><br />Në vendin e ngjarjes kanë mbërritur edhe forca të shumta policie, ndërsa bëhet me dije se në momentin e rënies së zjarrit në ambientet e burgut ndodheshin mbi 10 persona.<br /> <br />Drejt burgut të Rrogozhinës mësohet se është nisur edhe Drejtori i Përgjithshëm i Burgjeve, Artur Zoto.<br /><br />Shërbimi i Kontrollit të Brendshëm të burgjeve nis hetimet për shkaqet e zjarrit dhe zbardhjen e plotë të rrethanave.
