BRITANI- Zyra për Çështje të Brendshme të Britanisë së Madhe ka pezulluar testimet e gjuhës angleze të drejtuara nga ETS, një nga firmat më të mëdha në botë për administrimin e testimeve, si: TOEFL apo TOEIC.<br /><br />Pezullimi erdhi pas zbulimit të një mashtrimi në sistemin e vizave studentore, nga ana e rrjetit britanik BBC, i cili dërgoi një gazetare të infiltruar me kamera të fshehtë.<br /><br />Çdo vit, rreth 100 mijë studentë jo-europianë i nënshtrohen provimit për të marrë vizën studentore dhe të vazhdojnë studimet në Mbretërinë e Bashkuar.<br /><br />BBC arriti të zbulojë një rrjet të gjerë personash, të cilët ndihmonin studentët të merrnin një zgjatje të vizave të tyre, nëpërmjet mashtrimit, kundrejt një shume prej 600 eurosh.<br />Rrjeti zëvendësonte studentët me persona të tjerë që zhvillonin provimin në vend të klientëve që paguanin. Studentëve u kërkohej të paraqiteshin ditën e provimit thjesht për një foto e cila do të dokumentonte prezencën e tyre atë ditë, më pas ata zëvendësoheshin nga dikush tjetër i cili kryente provimin në vend të tyre.<br /><br />BBC dërgoi një gazetare të infiltruar në qendrën studentore ku kryheshin dhe provimet për vizë, si studente me një anglishte të dobët, e cila kërkonte të qëndronte në Mbretërinë e Bashkuar për të punuar ilegalisht. Pasi bëri verifikimet e nevojshme ditën e provimit, gazetarja e infiltruar u zëvendësua nga një tjetër person për të zhvilluar provimin me shkrim dhe me gojë, ndërsa ajo dhe studentët e tjerë qëndronin në këmbë.<br /><br />Një javë më vonë, gazetarja u paraqit në qendër për një tjetër provim, ku këtë rradhë administratori i provimeve u tregonte kandidatëve përgjigjet e sakta. Dhjetëra studentë përfunduan në 7 minuta, një provim i cili kërkonte rreth 2 orë.<br /><br />Disa ditë më vonë, të gjithë arritën të merrnin çertifikatën e TOEIC me pikë maksimale.<br />Sekretarja për Çështjet e Brendshme, Theresa May u shpreh e shokuar nga provat e mbledhura nga BBC.<br /><br />Pas publikimit të lajmit, qeveria britanike pezulloi dy kolegje, si dhe të gjitha testimet në gjuhën angleze të administruara nga ETS. Tre administratorë provimesh u larguan menjëherë nga puna.
