Kandidati presidencial i VMRO DPMNE-së duhet të jetë anëtar ose përkrahës i VMRO-së dhe të ketë qëndrimet e njëjta me partinë e Gruevskit rreth interesit shtetëror. Thënë troç, VMRO-ja nuk është e interesuar për konsensus me BDI-në rreth kandidatit presidencial, ofertë për të cilën tashmë kohë të gjatë po angazhohet partia e Ahmetit. Ilija Dimovski nga VMRO DPMNE thotë se kandidat konsensual mund të ketë vetëm nëse kandidati i zgjedhur nga 1300 delegatët e VMRO-së është i pranueshëm edhe për Ahmetin.<br /><br />"Kriteret tashmë janë bërë publike. Kandidati duhet të plotësojë kushtet kushtetuese për kryerjen e detyrës së presidentin, të jenë anëtarë të VMRO DPMNE-së ose përkrahës të politikave partiake dhe të gjejnë vetën në qëndrimet e VMRO DPMNE-së për çështjet në interes shtetëror dhe kombëtar", u shpreh Ilija Dimovski, VMRO DPMNE.<br /><br />Duke komentuar kërcënimin e BDI-së për bojkot të zgjedhjeve presidenciale nëse nuk pranohet kandidati konsensual, Dimovski tha se beson që pavarësisht apeleve partiake, qytetarët nuk do të lejojnë një skenar të tillë.<br /><br />"Ne besojmë në qytetarët e Maqedonisë, besojmë në vetëdijen e tyre për funksionalitetin e institucioneve të cilat vlejnë në Maqedoni. Besoj se qytetarët do të dinë ta njohin momentin, dhe nuk do të lejojnë të ndodh një skenar i tillë i padëshiruar", tha Ilija Dimovski, VMRO DPMNE.<br /><br />Nga VMRO-ja thonë gjithashtu se janë të gatshëm edhe për zgjedhjeve të parakohshme parlamentare, nëse ndonjë subjekt politik i shtron në tavolinë si alternativë të mundshme. Ndryshe, konventa zgjedhore për zgjedhjen e kandidatit presidencial të VMRO-së do të mbahet më 1 mars në Sallën Universale, ndërsa paraqitja e kandidaturave fillon që nesër. Benjamin Arifi
