TIRANE- Policia e Tiranës ka shoqëruar 32 persona brenda 24 orëve për shpërthimin që plagosi dhe gjymtoi 3 persona në rrugën "Pjetër Budi". <br /><br />Ngjarja ndodhi mëngjesin e 26 shkurtit, kur nga shpërthimi i telekomanduar rreth 500 gramëve eksploziv plastik, në lokalin e kompleksit "Grifon" mbetën të plagosur pronari Armand Çeka, truproja e i tij Artur Sharra dhe juristi, Julian Çela. <br /><br />Nga plagët e rënda mbetën të gjymtuar Çeka dhe Çela, ndërsa Sharra nuk ka marrë dëmtime të parekuperueshme.<br /><br />Sipas policisë, të shoqëruarit janë persona të cilëve Çeka u detyrohej shuma të konsiderueshme parash në formë borxhi, ku vetëm një personi ai detyrohej rreth 800 mijë euro. <br /><br />Mes të shoqëruarve janë edhe persona me të cilët Çeka kishte konflikt pasi u kishte shitur të njëjtën hyrje në apartamentet e ndërtuara prej tij, 2 personave të ndryshëm. <br /><br />Por edhe persona me të cilët Çeka ishte në konflikt pasi u kishte marrë paratë nga shitja e hyrjeve tek pallatet në rrugën "Don Bosko", por nuk kishte përfunduar plotësisht punimet. <br /><br />Madje edhe kompleksi "Grifon" më shumë shërbente si bazë për qëndrimin e Çekës sesa si lokal apo hotel. Kjo për faktin, se ai u shmangej personave të shumtë që e kërkonin për t'i kthyer paratë apo përfunduar punimet në apartamente.<br /><br />Policia ka siguruar edhe pamjet e kamerës së sigurisë një biznesi pranë kompleksit Grifon, që mendohet të ketë kapur edhe pamjet e autorëve. <br /><br />Policia ka kërkuar prej kompanive celulare zbardhjen e tabulateve telefonike të Çekës, pasi dyshohet se ai është thirrur në takim në kompleksion Grifon ku i ishte organizuar edhe antentati.<br /><br />Ky është rasti i dytë që Çekës i organizohet atentat, pasi në shtator i shpëtoi mrekullisht tentativës për ta eleminuar fizikisht me anë të një shpërthimi në automjetin e tij në rrugën "Siri Kodra".
