TIRANE- Katër ministra të kabinetit qeveritar Rama, nuk kanë dhënë ende dorëheqjen nga mandati i tyre i deputetit.<br /><br />Pavarësisht marrëveshjes së arritur ndërmjet PS-së dhe LSI-së se ministrat e kabinetit qeveritar duhet të japin dorëheqjen nga mandati i tyre, katër eksponent të ekzekutivit janë ende në proces e sipër të dorëzimit të mandatit të deputetit.<br /><br />Konkretisht Ministri i Brendshëm Saimir Tahiri, Ministri i Financave Shkëlqim Cani, Ministri i Jashtëm Ditmir Bushati dhe Ministri i Energjetikës Damian Gjiknuri, nuk kanë dorëzuar mandatin. Kjo vonesë e tyre mund të lidhet edhe me faktin se tri prej ministrave kanë qenë gjithmonë në qendër të akuzave të opozitës për punën e tyre në krye të ministrive.<br /><br />Akuzat e opozitës<br />Sulmet e vazhdueshme të Partisë Demokratike ndaj disa prej ministrave të kabinetit qeveritar, mund të ketë shkaktuar një hezitim të tyre për të mos dorëzuar mandatin e deputetit, pasi do të kërkonin më shumë kohë që të tregonin se akuzat e PD-së janë të pavërteta. Konkretisht, Ministri i Brendshëm, Saimir Tahiri është sulmuar më shumë nga të gjithë ministrat e tjerë të kabinetit qeveritarë.<br /><br />Që pas mandatit të qeverisë Rama në fund të muajit shtator, kohë kur mori zyrtarisht edhe detyrën, Partia Demokratike ka hedhur një lumë akuzash ndaj Tahirit, gjë e cila mund të ketë çuar edhe në hezitimin e tij për të dorëzuar mandatin e deputetit. Veç kësaj, rreth 2 muaj më parë kur filloi edhe dorëzimi i mandateve nga ana e ministrave, Tahiri plotësoi kërkesën për të hequr dorë nga posti i deputetit për të qenë vetëm Ministër i Brendshëm, por nuk e dorëzoi këtë në Komisionin Qendror të Zgjedhjeve.<br /><br />Krahas Tahirit, Shkëlqim Cani, Ministri i Financave, ka qenë gjithashtu edhe një nga personat më shumë të sulmuar nga ana e Partisë Demokratike. Konkretisht, këto sulme u intensifikuan më shumë, gjatë kohës kur po hartohej buxheti vjetor për vitin 2014 si edhe në 2 javorëshin e debatit në Kuvend. Ish-kryeministri Berisha ishte personi që hodhi më shumë akuza ndaj Ministrit të Financave, gjë e cila mund të këtë çuar në hezitimin e tij për të dorëzuar mandatin e deputetit.<br /><br />Edhe Ministri i Jashtëm, Ditmir Bushati gjithashtu ka qenë një nga pjesëtarët e ekzekutivit që është akuzuar shumë nga opozita. Konkretisht Bushati u vendos në qendër të sulmeve të PD-së gjatë kohës kur në vend po debatohej për çështjen e armëve kimike të Sirisë, si edhe në momentin kur në skenën e politikës shqiptare u fut edhe çështja e devijimit të dy lumenjve, Vjosa dhe Radika. Ndërsa Ministri i Energjetikës, Damian Gjiknuri është e kundërta e tri ministrave të tjerë. Ai nuk ka qenë në qendër të sulmeve të opozitës por mosdorëzimi i mandatit të tij mund të ketë ardhur për shkaqe të tjera.
