TIRANË - Prefektura e Tiranës e drejtuar nga Sadi Vorpsi ka bërë të ditur se, ka marrë me dhjetëra ankesa nga banorët në lidhje me ndërtimin e bulevardit të ri të Tiranës, duke iu përgjigjur edhe Bashkisë së kryeqytetit e cila sot akuzoi qeverinë se po bllokon ndërtimin.<br /> <br />Me një njoftim zyrtar, Prefektura e Tiranës bën të ditur se, "referuar ankesave të qytetarëve të Tiranës, pronat e të cilëve preken nga ndërtimi i Bulevardit të Ri, Prefektura e Tiranës bën me dije se për një periudhë disa mujore, ajo ka marrë me qindra ankesa apo dhe ka zhvilluar takime të drejtpërdrejta me ta, për shqetësimin lidhur me shpronësimet".<br /> <br />Sipas prefekturës, qytetarët "konkretisht, ata janë ankuar për referenca joreale në vlerësimin e pronave të tyre, krahasuar me çmimet e tregut". "Nisur nga ky shqetësim masiv në respekt të ligjit Prefektura e Tiranës i ka kërkuar INUK verifikimin e dokumentacionit tekniko-ligjor për shembjet në fjalë", bën të ditur prefektura me anë të një njoftimi për median.<br /> <br />Prefektura thotë se, "ky problem, i cili mund të marrë përmasat e një konflikti social ngrihet në bazë të shqetësimit të pronarëve ndaj Bashkisë së Tiranës se shpronësimet nuk po realizohen në përputhje dhe sipas afateve të përcaktuara në legjislacionin përkatës".<br /> <br />"Prefektura është e angazhuar të zbatojë gërmë për gërmë ligjin dhe të verifikojë çdo shqetësim të ngritur nga qytetarët në lidhje me shkelje të pretenduara nga ata", përfundon deklarata për mediat e Prefekturës së Tiranës.
