TIRANE- Arrestohet në Doganën e Kakavijës, teksa udhëtonte drejt Greqisë, ish-presidentja e firmës Piramidale "Gjallica".<br /> <br />Lajmi konfirmohet nga Drejtoria e Përgjithshme e Policisë, sipas të cilës, Shemsie Kadria, është arrestuar në bazë të një urdhër arresti të Prokurorisë të lëshuar në 23 mars të vitit të kaluar, për akuzën e mashtrimit me shuma të mëdha.<br /> <br />Burimet policore nuk dhanë detaje nëse bëhet fjalë për mashtrimin për banesë dhe shuma monetare në vlerë 2.1 milionë lekë të reja, akuzë për të cilën Kadria është shpallur e pafajshme apo është akuzë e re.<br /> <br />Nëse do të ishte e njëjta atëherë arresti rrezikon të rrëzohet nga gjykata dhe përgjegjësia i bie Prokurorisë që nuk e ka nxjerrë Kadrien nga lista e të kërkuarve.<br /> <br />Kadria u lirua nga burgu në 7 mars të vitit 2007 falë amnistisë së Presidentit të Republikës, në atë kohë, Alfred Moisiu, ndërsa i kishin mbetur ende 3 vite e gjysmë burg.<br /> <br />Në janar të vitit 2001, Gjykata e Tiranës e dënoi me 17 vjet burg ish-bosen e "Gjallicës", ndërsa në muajin qershor 2001 Gjykata e Apelit la të njëjtin vendim.<br /> <br />"Gjallica" ka patur 69 808 kreditorë, ndërsa borxhi i kompanisë, sipas ekspertëve, ka qenë mbi 200 milionë dollarë.
