TIRANË - Ora 02:07 e datës 25 mars 2014. Kamerat e sigurisë filmojnë momentin e lëvizjes së predhës dhe goditjen me murin e vilës tre katëshe të kryekomunarit Fatbardh Plaku, në zonën e njohur si Farkë e Vogël, në periferi të Tiranës. <br /><br />Pamjet e transmetuara ekskluzivisht nga TV A1 Report tregojnë predhën që përshkon rrugën përballë vilës, dhe godet fasadën.<br /><br />Nga pamjet duket momenti i parë i një shpërthimi drite që tregon vendin dhe aktivizimin e predhës nga antitanku, nga vendi ku është kryer goditja dhe më pas rrugën që përshkron predha derisa godet vilën.<br /><br />Sipas policisë ka shpërthyer vetëm mekanizmi ndezës dhe jo predha, duke shmangur një tragjedi, nëse do të shpërthente.<br /> <br />Kamera e A1 Report ka gjetur të freskëta edhe gjurmët e autorëve nga vendi ku mendohet se është realizuar qitja me antitank, që është pranë xhamisë dhe përballë vilës.<br /><br />Sipas policisë nuk rezulton të ketë lidhje mes xhamisë dhe ngjarjes dhe ndoshta ajo është zgjedhur si vend i duhur nga autorët për shkak të pozicionit të favorshëm që kishte për të goditur vilën e kreut të komunës së Farkës.<br /><br />Vetë Plaku, i cili drejton këtë komunë prej 17 vitesh, në një intervistë për gazetarin e tv A1 Report, Arsen Rusta thotë se familja e tij është e shokuar dhe se, gjatë 17 viteve në detyrë është mundur që të bëjë më të mirë. Nuk ka pasur konflikte në punë apo jetën e tij.<br /><br />"Muri është qëlluar me antitank. Në momentin kur ka ndodhur ngjarja e gjithë familja ka qenë në banesë në katin e dytë të saj", tha sot paradite Plaku për A1 Report. <br /><br />Fatmirësisht nga shpërthimi ka patur vetëm dëme materiale, dhe nuk ka dëmtuar asnjë prej pjesëtarëve të familjes Plaku, të cilët në atë orë kanë qenë në gjumë. <br /><br />Policia dhe prokuroria e Tiranës kanë ngritur një grup të zgjeruar hetimor ku janë përfshirë edhe oficerët antiterror.
