TIRANE- Ministria e Shëndetësisë do të transformojë rrënjësisht mënyrën se si bëhet sterilizimi i instrumenteve kirurgjikale të sallave te operacionit. Falë një bashkëpunimi me Universitetin e Perugias, po shikohet mundësia që sterilizimi të bëhet jashtë sallave të operacionit dhe mjekëve t'u çohet seti i plotë i sterilizuar, duke garantuar cilësi më të madhe të ofrimit të shërbimit edhe në sallën e operacionit. Sipas ministrit të Shëndetësisë, Ilir Beqaj, ka ardhur koha për një rinovim total të të gjithë parkut të setit kirurgjikal të spitaleve tona publike.<br /> <br />Gjatë një konferencë të përbashkët të zhvilluar në ministrinë e Shëndetësisë, ekspertët e universitetit të Perugias, kanë prezantuar një studim të detajuar për situatën e sallave të operacionit në vendin tonë dhe përfitimet e përdorimit të tyre me efektivitet.<br /> <br />"Ne kemi marrë në studim procesin e planifikimit të operacioneve dhe procesin e sterilizimit të instrumenteve kirurgjikale. Duke përmirësuar mënyrën se si planifikohen operacionet, përmirësohet edhe mënyra se si përdoren sallat e operacionit dhe duke përmirësuar këtë gjë, rritet numri i ndërhyrjeve që kryhen dhe reduktohen kostot e përdorimit të tyre. Një sterilizim më i mirë i instrumenteve kirurgjikale ul numrin e infeksioneve jo vetëm në sallën e operacionit por edhe ne ata pas operatore, dukë përmirësuar kështu shërbimin që i jepet pacientit", tha Dott.Ing. Vanessa Rossi, Universiteti i studimeve të Perugias.<br /> <br />Bashkëpunimi mes ministrisë së Shëndetësisë dhe Universitetit të Perugias në Itali, mbështetet në Strategjinë e Sistemit Shëndetësor, dhe synon të ofrojë një shërbim të specializuar mbështetës të sterilizimit të instrumenteve mjekësorë për sallat e operacionit.
