Pas debateve për kallëzimin penal për shpërdorim detyre dhe korrupsion, ish-Ministri Arben Imami, dhe Ministrja e Mbrojtjes Mimi Kodheli, janë përplasur ashpër në parlament. Imami ka hedhur një akuzë të rëndë mbi Ministren Kodheli, se po përdor Forcat e Armatosura për transportin e lëndëve narkotike.<br />"Infrastruktura ushtarake e një ushtrie të NATO-s po përdoret rregullisht për infrastrukturë të transportit të lëndëve narkotike dhe për këtë duhet të vijë edhe të japë përgjigje ministrja" tha Imami.<br />Përballë kësaj akuze të rëndë, Ministrja Kodheli ka zgjedhur të heshtë duke u mjaftuar me një reagim të kryetarit të parlamentit, Ilir Meta.<br />"Ishte shumë e rëndë kjo gjëja e fundit pasi implikonte edhe NATO-n" tha Meta.<br />E vetmja përgjigje e Ministres se Mbrojtjes, ishte etiketimi që ajo i bëri parardhësit të saj për shkatërrimin e Forcave të Armatosura.<br />Mimi Kodheli: "Reflektoni me zë të lartë dhe hajdeni t`i diskutojmë reformat në këtë fushë siç i takon nderit të këtij Parlamenti".<br />Arben Imami: "Nuk ke mënd ti të thuash reflektoni. Nuk e ke atë kapacitet".<br />Këto akuza dhe debate erdhën në rrjedhën e diskutimeve mbi draft-ligjin që synon heqjen e disa kompetencave të Presidentit, për drejtimin dhe komandimin e Forcave të Armatosura.
