Ka nisur këtë të martë gjykimi i shkurtuar në gjykatën e rrethit gjyqësor Shkoder ndaj kryetarit të komunës Postribë, Faz Shabaj, kreut të misionarëve të paqes e pajtimit të gjaqeve Nikoll Shullani, si dhe 6 kryepleqve të komunës Postribë.<br />Mbi ta rëndon akuza e lëshimit të dëshmive fallso për gjakmarrje, ku persona të caktuar i kanë paraqitur në Belgjikë për të kërkuar azil politik.<br />Sipas organit të akuzës fillimisht dëshmitë për gjakmarrje janë lëshuar nga kryepleqtë, më pas ato janë firmosur te kryetari i komunës dhe në fund nga shoqata e pajtimit të gjaqeve.<br />Denoncimi për këtë çështje ka ardhur nga një familje në Belgjikë, e cila ja ka paraqitur autoriteteve belge për të kërkuar azil politik dhe atje dokumenti është zbuluar sipas organit të akuzës që është fallso.<br />Gjithsej sipas prokurorit të çeshtjes kanë rezultuar fallso 7 dokumenta të lëshuar nga palët e akuzuara, për disa familje.<br />Pas përfundimit të kësaj seance gjyqësore, kreu i shoqatës së misionarëve të paqes dhe pajtimit të gjaqeve, Nikoll Shullani, tha se vërtetimet janë lëshuar vetëm për ato familje që realisht janë në gjak, për kudo që ti nevojiten.<br />"U kemi bërë vërtetime atyre familjeve që kanë qenë me probleme të gjakmarrjes, ne nuk u kemi bërë vërtetime që të shkojnë askund në botë, por na i kanë këkruar për ku tu nevojiten. Ne se kemi ditur që do shkojnë as në Belgjikë, as Francë, as në ndonjë vend tjetër. Kanë kërkuar një letër, na e lësho se jemi në gjak, ua kemi lëshuar pasi nuk e kemi ditur se po i bëjmë keq kujt" tha ai.<br />Nga hetimi i prokurorisë së Shkodrës ka rezultuar se faktet e paraqitura në dokumentacion janë të gjitha të pavërteta.