Moti i ftoftë me reshje bore dhe i pazakontë për stinën e pranverës do të vazhdojë deri në fundjavë. Kështu paralajmërojnë nga Enti hidrometeorologjik të cilët thonë se temperatura më të ulëta deri në minus 2 gradë priten gjatë ditës së nesërme, të cilat njëkohësisht do të jenë të shoqëruara me reshje shiu dhe bore në viset më të larta. Meteorologët paralajmërojnë se rritja graduale e temperaturave do të nis nga dita e diel ku temperaturat maksimale do të arrijnë deri në 19 gradë.<br /><br />"Nesër reshje shiu më së shumti do të ketë në pjesët juglindore dhe eventualisht në pjesët perëndimore të vendit. Nesër temperaturat maksimale do të jenë prej- 2 deri në 3 gradë, që do të thotë më ftohtë se sot. Temperatura maksimale ditore do të jetë prej 7 deri në 14 gradë, në Shkup deri në 9 gradë. Edhe gjatë ditëve në vazhdim mëngjeset do të jenë të ftohta, temperatura maksimale do të jetë prej 0 deri në 5 gradë. Të shtunën do të ketë reshje shiu, kurse dita e parë pa reshje do të jetë e diela kur temperaturat do të arrijnë deri në 19 gradë", Boris Sekiraeski, sinoptikan.<br /><br />Temperaturat e ulëta dhe reshjet e shpeshta të shiut kanë shqetësuar edhe bujqit. Avdi Emini nga fshati Straçincë thotë se reshjet dhe i ftohti nuk janë të mirëseardhura për bujqësinë në këtë periudhë për shkak se në të shumtën e rasteve shkaktojnë kalbjen e rrënjëve të mbjellave.<br /><br />"Lagështia e tepërt vjen deri te ajo që rrënjët e perimeve mund të kalben dhe rendimentet do të jenë pak më të dobëta dhe sigurisht mund të jenë shkatërruese për perimet. Këto perimet e buta, siç përmenda dredhëzat, shalqiri, specat, domatet dhe të tjerat, këto me të vërtet nëse bie nën minus temperatura në të ftoftë atëherë mund të vijë edhe të ngrirja e gjetheve, ngrirja e luleve të çelura edhe mund të shkatërrohen vërtet nga i ftohti i madh edhe do të ketë me siguri dëm bujqësia", u shpreh Avdi Emini, bujk<br /><br />Reshjet e borës sot vëreheshin edhe në Vodno të Shkupit, ndërsa më të dukshme dhe në trashësi deri në 30 centimetra kishte në Mavrovë dhe rajonin e Pollogut. Moti i ftohtë ka përfshirë pothuajse tërë Ballkanin ndërsa trashësia e borës në Kosovë kishte kaluar 40 centimetra. Melihate Rustemi
