TIRANË - Njësia Task-Force pranë Prokurorisë së Përgjithshme me urdhër të kryeprokurorit Adriatik Llalla ka nisur verifikimet ndaj kallëzimit për anëtarin e Këshillit të Lartë të Drejtësisë, Gjin Gjoni.<br /> <br />Një grup prej 4 prokurorësh kanë nisur nga puna me dosjen voluminoze prej 100 faqesh që Inspektoriati i Lartë i Deklarimit të Pasurive dhe Konfliktit të Interesit ka dorëzuar bashkangjitur kallëzimit ndaj Gjonit.<br /> <br />Burime për A1Report nga akuza bëjnë me dije për A1Report se kallëzimi është protokolluar pasditen e djeshme në prokurorinë e përgjithshme ndërsa sot ka nisur menjëherë nga puna njësia taska forcë për veprimet e para proceduriale.<br /> <br />Po të njëjta burime theksuan se verifikimi mund të zgjasë maksimumi në një muaj, e në përfundim të kësaj procedure do të vendoset nëse do të nis apo jo procedim penal ndaj gjyqtarit Gjin Gjoni.<br /> <br />ILDKP bëri publik një ditë më parë kallëzimin për fshehje të pasurisë dhe deklarime të rreme që gjyqtari Gjin Gjoni ka bërë pranë këtij institucioni, ndërsa vetë ky i fundit mohon këtë fakt duke thënë se ai ka deklaruar gjithçka dhe pasuria në fjalë i përket bashkëshortes dhe jo atij.<br /> <br />A1 Report ka mundur të sigurojë dhe pamjet e vilës me vlerë 700 mijë euro të gjyqtarit Gjin Gjoni, pasuri kjo e listuar në kallëzimin e ILDKPKI-së.<br /> <br />Në një kohë kur prokuroria ka nisur nga puna me verifikimin e kallëzimit penal dhe dosjes 100 faqëshe me prova dhe fakte ndaj Gjin Gjonit, ende asnjë veprim nuk është kryer nga Këshilli i Lartë i Drejtësisë për këtë situatë ndërsa mbledhja e rradhës mbetet ende e papërcaktuar se kur do të zhvillohet.
