Ish prokuroja zvicerane në Tribunalin për krimet e luftës në ish Jugosllavi në Hagë, Carla del Ponte, është shprehur e habitur me vendimin për themelimin e Gjykatës Speciale për Kosovën. Ajo i ka deklaruar Radios zvicerane SFR se "nuk ka nevojë të ketë Gjykatë të re për të gjykuar krimet e pretenduara të luftës në Kosovë", transmeton gazeta zvicerane Blick.<br /><br />"Më duhet të pranoj se jam e habitur me këtë vendim', ka thënë Del Ponte për radion zvicerane SFR. E pyetur nga gazetarja e emisionit "Sot në mëngjes" nëse ajo besonte në suksesin e kësaj gjykate, Del Ponte është përgjigjur "kam dyshime për këtë."<br /><br />Ajo ka thënë se ka një Tribunal që trajton krimet e kryera në hapësirën e ish Jugosllavisë dhe se ky është Tribunali ndërkombëtar i OKB-së në Hagë. Të gjitha hetimet që janë bërë për krimet e mundshme në Kosovë, kanë qenë pjesë e këtij Tribunali, ka deklaruar ajo.<br /><br />Carla del Ponte ka shprehur habinë që në Kosovë të themelohet një gjykatë e tillë.<br /><br />"Të gjitha hetimet, të cilat janë kryer për krimet e supozuara në Kosovë, për të cilat planifikohet të ngritët Gjykata, deri më tani nuk kanë sjellë asgjë në dritë", ka deklaruar Del Ponte./Kosovapress/
