Gjirokastër - Trafikimi lëndëve narkotike në jug të vendit po merr përmasa gjigande, ndërkohë që në qendër të vëmendjes ngelet gjithmonë Gjirokastra dhe droga që del nga fshati Lazarat.<br /><br />30 kilogramë të tjera janë sekuestruar nga policia e këtij qyteti, ndërkohë që uniformat blu kanë bërë të mundur arrestimin e transportuesit të saj, 61-vjeçarin nga Mirdita, Ndue Marku.<br /><br />Nga informacionet mësohet se lënda narkotike ishte fshehur poshtë sediles së pasme të automjetit që drejtohej nga 61-vjeçari Marku, i cili kishte krijuar një dhomë artificiale, posaçërisht për fshehjen e lëndës narkotike.<br /><br />Bllokimi i drogës u realizua falë kontrollit policor të kryer pranë zonës së Ujit të ftohtë në aksin Gjirokastër-Tepelenë. Sasia e lëndës narkotike ishte e ndarë në 23 pako dhe mësohet se transportuesi i saj ka deklaruar se ajo ishte siguruar në fshatin Lazarat dhe do të transportohej drejt Tiranës.<br /><br />Vetëm një ditë më parë, nga agjentët e antidrogës, falë operacionit të koduar "udin", i zhvilluar në komunën e Zagorisë, u bë e mundur sekuestrimi i gjysëm ton marijuanë, ndërsa në pranga u vendosën dy persona si dhe disa të tjerë tashmë të identifikuar nga policia si pjesë e këtij rrjeti trafikimi, janë shpallur në kërkim dhe policia po punon për kapjen e tyre.
