Historia e emigrantit shqiptar që mbeti i vrarë gjatë pengmarrjes së një autobusi me shtetas greke në Selanik është bërë bërë subjekt në cilin është ndërtuar një film në Greqi, por edhe një këngë në vendlindje. <br /><br />Flamur Pisli nga fshati Patin i Matit kishte emigruar në Greqi që në moshë të mitur. Kishte kryer punë të ndryshme derisa nga mesi i vitit 1996 punonte tek tokat me ullinj të një polici grek.<br /><br />Pisli në atë kohë denoncoi këtë të fundit se nuk e kishte paguar për një periudhë prej 2 vitesh e gjysmë, madje se në fillim të vitit 1999 e arrestoi, dhunuar në qeli dhe dëbuar nga Greqia për të mos i dhënë 1.5 milionë dhrahmitë e punës, që në atë kohë kushtonin 600 mijë lekë të reja. <br /><br />Pisli qëndroi 3 muaj në Shqipëri, dhe niset sërish në mënyrë klandestine drejt Selanikut ku kishte punuar për të marrë paratë e punës së papaguar. <br /><br />Rreth orës 10.00 të 28 majit të vitit 1999, me një automatik kallashnikov Pisli merr peng autobusin e shoqerise greke "KTEL", të linjës Selanik-Kozan me 15 pasagjerë dhe kërkon 50 milionë dhrahmi për lirimin e tyre. <br /><br />Pisli liron gjysmën e pengjeve dhe mban vetëm 8 nga të cilët 3 ishin gra. Pisli kërkonte 50 milionët dhe siguri për të mbërritur i gjallë në Shqipëri në këmbim të pengjeve. <br /><br />Gjatë rrugëtimit për në Shqipëri, ai ka diskutuar me pengjet për motivin e këtij veprimi duke treguar dhe shenjat e plagëve që kishte marrë nga torturat në Greqi, ndërsa për destinacion dhe vend për lirimin e pengjeve kishte vendosur fshatin e tij të lindjes në Mat.<br /><br />Autobusi ka kaluar i pandaluar pikën e kalimit Kufitar në Kapshticë, ndërsa në fshatin Fikas në ngjitje të Qafës së Krrabës, autobusi u ndalua nga Forcat Speciale Renea. <br /><br />Operacioni drejtohej nga Artan Didi, që në atë kohë ishte drejtues i forcave speciale. Didi ka qenë personi që ka marrë përsipër edhe të shtënat për lirimin e pengjeve në autobus që vranë Pislin, në një ngjarje ku mbeti i vrarë dhe një shtetas grek.<br /><br />Për ngjarjen pati një hetim nga policia shqiptare, ndërsa Didi, u vlerësua për mënyrën e zbatimit të detyrës.
