TIRANE - Ish Ministri i Mbrojtjes Arben Imami shmang në shpjegimet për Prokurorinë emrat e personave që e kanë njoftuar për dyshimet për trafik droge nga aerodromi i Gjadrit, të cilat u bënë shkak për akuzat e tij ndaj ministres Mimi Kodheli dhe Forcave të Armatosura. <br /><br />"Disa ish-punonjës së Policisë së Shtetit më kanë informuar për trafikun e mundshëm të lëndëve narkotike nëpërmjet bazës ushtarake të Gjadrit, aty ku është parë të ulet një avion civil"- ka qenë shpjegimi i Imamit për Prokurorin e Përgjithshëm Adriatik Llalla.<br /><br />Në fakt, ka qenë Prokuroria e Përgjithshme që i ka dërguar një shkresë zyrtare Imamit, për informacionet që ai kishte për akuzat për trafik droge me avionë nga bazat ushtarake. <br /><br />Kërkesa vinte pas akuzave publike të Imamit. Ish ministri mësohet se i është përgjigjur po me një letër kryeprokurorit por pa dhënë emrat e personave që e kanë informuar, dhe pranuar se informacionet i kanë ardhur nga një ish-drejtues i policisë, i cili nuk është më në detyra në Policinë e Shtetit.<br /><br />Prokuroria e Përgjithshme është në proces verifikimi të të gjitha deklaratave dhe informacioneve për një trafik të mundshëm droge me avionë nga Shqipëria.<br /><br />Trafiku i drogës me avion është mohuar nga Forcat e Armatosura, por edhe nga vetë Visho Ajazi Lika, shefi i shërbimit informative shtetëror nga ku rezulton të ketë dalë një kërkesë për verifikimin e një informacioni të tillë.
