VMRO DPMNE dhe BDI arritën marrëveshje për formimin e qeverisë së re. Mjaftoi një komunikatë e përbashkët e këtyre dy subjekteve politike që të konfirmojnë marrëveshjen, e cila nuk parasheh rregullimin e çështjes së gjuhës shqipe, lë BDI-në pa postin e kryetarit të Kuvendit dhe askund nuk përmenden ndryshimet kushtetuese për zgjedhjen e presidentit konsensual që BDI me ngulm i kërkonte në fushatë. Në komunikatën e përbashkët thuhet se Qeveria e re do të fokusohet vetëm në procesin eurointegrues dhe zhvillimin ekonomik të vendit.<br /><br />"Partitë, konform përcaktimeve programore dhe premtimeve të veta elektorale, vendosën që përparësi kryesore të veprimit të ardhshëm qeverisës, në periudhën që pason, të jenë integrimet euroatlantike si dhe zhvillimi ekonomik i vendit i shprehur përmes reformave dhe projekteve për përmirësimin e gjendjes ekonomike dhe sociale, vendeve të reja të punës dhe investimeve", theksohet në komunikatën e përbashkët të VMRO DPMNE-së dhe BDI-së.<br /><br />Dy subjektet kanë rënë dakord që të formojnë një grup të përbashkët pune i cili dotë ketë për detyrë të vlerësojë dhe mbështesë punën e qeverisë dhe ministrive të përfshira në procesin euroatlantik dhe zhvillimin ekonomik.<br /><br /> "Deri në samitin e NATO-s dhe Këshillit të Ministrave të BE-së, përfaqësuesit e këtij grupi të punës rregullisht do ti informojnë partitë për rezultatet e arritura dhe hapat e bërë, për masat dhe reformat e realizuara, në bazë të së cilës do të vendosen hapat e mëtejmë dhe veprimet e partive të cilat formojnë qeverinë", qëndron ndër të tjera në komunikatën e përbashkët të VMRO DPMNE-së dhe BDI-së.<br /><br />Edhe pse BDI nuk arriti të merr postin e kryetarit të Kuvendit, bisedimet tani do të fokusohen në ndarjen e ministrive. Bisedimet për këtë çështje duhet të mbarojnë kah mesi i qershorit. Tani mbetet të shihet nëse BDI do të marrë pjesë në inaugurimin e Presidentit Ivanov, të hënën në parlament. Një ditë më parë nga VMRO DPMNE theksuan se kontestimi i legjitimitetit të Ivanovit është problem vetëm i atij që e konteston, sidomos i atij që ndoshta do të duhet të bashkëpunojë me Ivanovin, madje se do të ishte jo logjike çfarë do bashkëpunimi mes kryetarit të shtetit dhe atyre që nuk e pranojnë. Semra Jakupi
