TIRANE -- Prokuroria dorëzon kërkesat për pezullimin nga detyra të gjyqtarit Gjin Gjonin, i cili është edhe anëtar i Këshillit të Lartë të Drejtësisë si dhe të dy gjyqtarëve bashkëshortë Ken Dhima dhe Klorinda Çela.<br /> <br />Kërkesat janë depozituar për Gjonin në gjykatën e Elbasanit, ndërsa për Çelën dhe Dhimën në gjykatën e Durrësit.<br /> <br />Lajmi konfirmohet nga burime zyrtare të Prokurorisë së Përgjithshme sipas të cilave kërkesat për pezullimet e gjyqtarëve janë bërë të mërkurën dhe akuza është e njëjtë, për "Refuzimin për deklarimin, mosdeklarimin, fshehjes ose deklarimit të rremë të pasurive të personave të zgjedhur dhe nëpunësve publikë ose të çdo personi tjetër që ka detyrimin ligjor për deklarim".<br /><br />Po sipas të njëjtit burim pas shqyrtimit të materialit në kallëzim, organi i Prokurorisë vlerëson të nevojshme për hetimin aplikimin e masave ndaluese "pezullim nga detyra" ndaj tre personave me funksione publike deri në përfundim të hetimeve, sipas parashikimit të nenit 242 të Kodit të Procedurës Penale.<br /><br />Për anëtarin e Këshillit të Lartë të Drejtësisë, procedimi u regjistrua në prokurorinë e Elbasanit, për shkak të konfliktit të interesit që mund të kishte përsa kohë Gjin Gjoni ushtron dhe detyrën e gjyqtarit të Apelit në Tiranë. <br /><br />Për të Inspektoriati i Lartë i Deklarimit dhe Kontrollit të Pasurive depozitoi kallëzimin penal në Prokurorinë e Përgjithshme për fshehje të pasurisë së tij dhe bashkëshortes, falsifikime, deklarime dhe kontrata të rreme me vlerë 1 842 796 euro, 53 270 000 lekë të reja dhe 180 mijë usd. <br /><br />Për dy gjyqtarët e Gjykatës Administrative që janë edhe bashkëshortë, Dhima dhe Çela procedimi u regjistrua në Gjykatën e Durrës pas kallëzimit të ILDKP se kanë mashtruar për llogaritë e transaksionet bankare, duke dhënë edhe deklarime të rreme për huamarrje, dhurata apo shlyerje këstesh për apartamente me vlerë 5 820 000 lekë dhe 214 300 euro.
