Atmosferë e tensionuar ka mbretëruar mbrëmë edhe në Saraj, ku ishin tubuar banorët pas paralajmërimeve se protestuesit nga Gjorçe Petrovi ishin nisur në drejtim të lagjes së tyre, e që fatmirësisht u ndalën nga policia. Sot edhe aty situata ishte e qetë, ndërsa banorët thonë se nuk kanë pasur probleme, por situata e tensionuar është ndjerë edhe në vendbanimet e tyre.<br /><br />"Neve na erdh keq të gjithëve, edhe pse është maqedonas na erdh keq edhe për atë, por ato që bënë probleme tani me këto trazirat nuk e kanë bërë mirë. Njerëzit normal ishin të revoltuar të gjithë. Sot është më e qetë pak puna, kështu që ishalla bëhet më mirë".<br /><br />"Situata është e qetë këtu në Saraj, nuk ka asgjë".<br /><br />Banorët shpjegojnë gjithashtu se për shkak të situatës së krijuar, gjimnazistët e Sarajit nuk kanë ndjekur mësimin në shkollat e mesme dy ditët e fundit, për të evituar rrezikun nga incidentet në autobusë.<br /><br />"Ajo vajza e djalit është e regjistruar në medicinë, mbrëmë e pa në internet, profesoresha u ka shkruar të mos shkojnë në shkollë".<br /><br />Situata mbrëmë në Saraj u qetësua pas apeleve të shumta të autoriteteve se gjendja është nën kontroll, dhe se policia ka siguruar hyrje-daljet për në Saraj. Ndërkaq sot kryetari i Komunës Bekim Murati u bëri sërish apel qytetarëve që të jenë të qetë pasi që sipas tij nuk ka vend për shqetësim.<br /><br />"Dëshiroj të apeloj banorët e komunës së Sarajit që në asnjë mënyrë të mos jenë pre e provokimeve të ndryshme, pre e dezinformatave të ndryshme, pasi ne si Komunë bashkë me MPB-në jemi në kontakt permanent dhe i kemi ndërmarrë të gjitha masat e nevojshme që ata të ndjehen të sigurt, dhe ajo që ka ndodh këtyre dy ditëve në Komunën fqinje të Gjorçe Petrovit dhe tentativat e tyre për të provokuar dhe për të sulmuar persona të pafajshëm që kanë lëvizur asaj periudhe, të mos ndodhin më asnjëherë", deklaroi Bekim Murati, kryetar i Komunës së Sarajit.<br /><br />Ndërkohë tensionet në Gjorçe Petrov diktojnë atmosferë të tendosur edhe në Nerezin fqinj. Banorët thonë se është qetë, por përcjellin me vëmendje se çfarë ndodh në rrethinën e tyre.<br /><br />"Kemi pas shqetësime, kemi ndejt deri në ora 1, 2... Kemi prit mos ka ndonjë problem".<br /><br />"Nuk kemi qetë rehat. Jemi frikësuar mos të na ndodh diçka, nuk kemi flejt rehat këto dy net".<br /><br />Sidoqoftë banorët shqiptarë të kësaj lagjeje, kafenë e mëngjesit të sotëm e pinin në tavolinën e njëjtë me bashkëqytetarët maqedonas.<br /><br />"Mirë është, super. Gjithmonë jemi bashkë, nuk ka kurrfarë probleme".<br /><br />"Nuk ka kurgjo, ne me vendasit maqedonas nuk kemi probleme, asnjëherë nuk kemi pasur".<br /><br />Banorët e të gjitha vendbanimeve që vizitoi ekipi ynë, vlerësojnë se vrasjes nuk duhet ti jepet konotacion ndëretnik, por të zgjidhet sipas ligjit, sikur edhe çdo vrasje tjetër. Benjamin Arifi
