BRUKSEL- Ministrat e Mbrojtjes të 28 vendeve anëtare të NATO-s gjatë takimit në Bruksel diskutuan për shikimin e masave afatgjata për të forcuar mbrojtjen e aleancës në Evropën lindore dhe se si të kundërshtoheshin taktikat e përdorura nga Rusia në Ukrainë.<br /><br />Gjatë tre muajve që prej shpërthimit të krizës në Ukrainë, NATO ka dërguar avionë dhe anije ushtarake për të siguruar aleatët evropiane në Lindje, të cilët janë alarmuar nga veprimet e Rusisë.<br /><br />Ndërkohë SHBA e bëri të qartë se nuk ka si qëllim të ndërhyjë ushtarakisht në Ukrainë. Polonia i ka bërë thirrje NATO-s që të vendosë trupa të përhershme në territorin e saj si përgjigje ndaj veprimeve të Rusisë, një lëvizje për të cilën Moska thotë se do të shkelte marrëveshjen e 1997-ës mes Rusisë dhe NATO-s. Por disa aleatë të NATO-s argumentuan se bazat e përhershme në lindje janë shumë të kushtueshme dhe nuk janë domosdoshmëri ushtarake.<br /><br />Këto diskutime u zhvilluan pasi presidenti amerikan Obama deklaroi nga Varshava se do t'i kërkonte Kongresit të miratonte një fond prej 1 miliard dollarësh për të rritur praninë ushtarake në Evropë.
