TIRANE - Policia e kryeqytetit do të njoftonte më 4 Shkurt të këtij viti se arrestoi në flagrancë teksa shiste tre pistoleta, Albin Mexhaj, 29-vjeçarin nga fshati Gërdec.<br /><br />Ndërsa hetimet e hapura për bandën e tritolit ku bënte pjesë dhe vrasësi seriali Julian Sinanaj kanë nxjerrë se Mexhaj, i arrestuar për armbajtje pa leje, ka qenë personi që furnizonte killerin me armë dhe municione.<br /><br />Nisur nga rrethanat e këtij hetimi Prokuroria për Krime të Rënda i ka komunikuar "arrestin me burg" Albin Mexhajt, në ambjentet e burgut 302 ku ky i fundit ndodhet pas arrestimit në muajin Shkurt.<br /><br />Burime nga Prokuroria e Krimeve të Rënda thanë për A1Report se Mexhaj i ka shitur vrasësit me pagesë Julian Sinanajt 2 pistoleta dhe një antiplumb, armatime këto të gjetura gjatë kontrollit në banesën e Sinanajt.<br /><br />Hetimet kanë nxjerrë në pah se kontakti i Sinanjt me Mexhajn është bërë nëpërmjet Ndriçim Gjokonajt pasi Mexhaj dhe bashkëpunëtori i drejtësisë në hetimet mbi bandën e tritolit kishin njohje të mëparshme.<br /><br />Veç akuzës për armëmbajtje pa leje, Mexhaj do të përballet dhe me akuzën e trafikimit të armëve dhe municioneve luftarake në bashkëpunim me Julian Sinanjt dhe Ndriçim Gjokonaj.<br /><br />Masa e sigurisë për Mexhajnt është marrë në mungesë ndërsa për t'u njohur me të pritet që 29-vjeçari nga Gërdeci të dalë para gjykatës në fundjavë.<br /><br />Julian Sinanaj akuzohet për disa vrasje dhe vendosje eksplozivi ndaj personave të ndryshëm, kundrejt pagesave dhe porosive të kushërinjëve Andon dhe Genis Mëhillaj nga Vlora. Nën akuzë për bandën e tritolit deri tani janë Sinanj, Gjokonaj, Karcini dhe Andon Mëhillaj ndërsa Genis Mëhillaj është ende në kërkim pasi dyshohet të jetë larguar jashtë Shqipërisë.
