VIENE- Përpara vendimit të vendeve anëtare për statusin kandidat është Vjena këtë herë që është angazhuar në nxitjen e unionit për të mos hezituar të votojë pro Shqipërisë.<br /><br />Si vijim i konferencës së pak ditëve më parë të zhvilluar në kryeqytetin austriak, ku u konfirmua mbështetja për procesin e avancimit në BE, ministri i Jashtëm i këtij vendi, Sebastian Kurz iu ka nisur një letër homologëve të vendeve të unionit, baroneshës Catherine Ashton dhe Greqisë, si vendi që mban presidencën e radhës së BE, me përmbajtje theksimin e progresit të Shqipërisë dhe përmbushjen prej saj të kushteve të vendosura.<br /><br />Ndërsa vetëm gjashtë muaj më parë, përpara këshillit të dhjetorit, e njëjta nismë nga vendet fqinje të Shqipërisë u firmos nga dhjetë vende anëtare të BE-së, këtë herë duket se numri i shteteve që kanë hedhur firmën për statusin e Shqipërisë është rritur drejt dyfishimit.<br /><br />Përfshirë Greqinë, janë 17 vendet anëtare të BE-së që kanë firmosur letrën e cila nis me vlerësimin e vullnetit të treguar nga qeveria e re shqiptare në fushat prioritare, ku veçohen arritjet në luftën kundër krimit të organizuar dhe korrupsionit, të cilat janë intensifikuar, thuhet në letër, dhe për të cilat qeveria ka treguar vendosmëri.<br /><br />"Duke u nisur nga angazhimi dhe progresi i Shqipërisë, ashtu si u nënvizua në raportin e qershorit të 2014-s, qartësisht meriton që vendet anëtare të Bashkimit Europian t'i njohin statusin e vendit kandidat. Shqipëria bindshëm ka përmbushur kushtet e vendosura nga BE", thuhet në letër.<br /><br />Ministrat e Jashtëm firmosës të letrës konfirmojnë rritjen e përpjekjeve të qeverisë shqiptare për respektimin e sundimit të ligjit, e forcimin e institucioneve të anti-korrupsionit. Duke nënvizuar edhe shembuj konkretë të këtyre arritjeve, si dhe vullnetin e treguar për fillimin e reformës në drejtësi, ministrat e BE-së përsërisin mbështetjen për dhënien e statusit të vendit kandidat Shqipërisë.<br /><br />"Kjo do të inkurajonte Shqipërinë në vazhdimin rrugës së reformave dhe për mbajtur vrullin e saj. Zgjerimi është një proces që ka rregulla strikte. Është e rëndësishme të tregojmë se kur kushtet janë përmbushur, BE duhet të jetë gati të shpërblejë progresin dhe të ndihmojë vendet në rrugën e tyre të anëtarësimit. Dhënia e statusit të vendit kandidat Shqipërisë do të jetë një sinjal i fortë për vendet e rajonit, për fuqinë transformuese dhe stabilizuese të procesit të zgjerimit, proces që është njëkohësisht në të mirën e qytetarëve të BE dhe atyre të vendeve aspirante gjithashtu", nënvizohet në letër.<br /><br />Letra, që ka qarkulluar në kancelaritë europiane përgjatë tre ditëve, është një sinkronim i plotë i raportit të Komisionit Europian në rekomandimin për statusin Shqipërisë. Megjithë sinjalet mbështetëse të Gjermanisë, Holandës dhe Danimarkës, firma e tyre mungon në këtë letër për shkak të proçedurave të brendshme, ku duhet të informohet më herët Parlamenti i tyre kombëtar.<br /><br />Deri tani asnjë vend nuk i ka thënë "jo" statusit kandidat të Shqipërisë, por mbetet për t'u prit...
