Për herë të 22-të me radhë, plazhi me rërë në ishullit Coney të Nju Jorkut mirëpriti konkursin e skulpturave të rërës në kuadër të festës për Ditën e Bashkimit. Më shumë se 50 pirgje të mëdhenj rëre u transformuan në vepra arti nga profesionistë, amatorë, apo edhe fëmijë pjesëmarrës. Skulptorët mbërritën që herët në mëngjes për të punuar veprat e tyre, të cilat do të vlerësoheshin nga kompania 'Akuariumi' e Nju Jorkut, organizuese e kësaj ngjarjeje. Mjeshtri Bill Sishone tha i bindur se çdokush mund të krijojë skulptura, mjafton ideja, rëra e lagësht dhe mistria që e gdhend atë.<br />"Nuk duhet shumë përgatitje, pak ujë, pak kohë dhe pak durim. Nëse ke talent dhe je praktikuar pak më herët, kjo gjë nuk është problem. Thjesht, të ecën dora", u shpreh Bill Sishone, skulptor profesionist.<br />Garuesit amatorë konkurruan në 5 kategori, duke u ndarë sipas moshës, në grupe dhe individualisht. Secila prej tyre kishte avantazhet dhe disavantazhet, pasi ndonjëherë idetë nuk shkojnë si duhet. Xhon Alberga dhe shokët e tij, në këtë konkurs ia mësynë të bënin kala.<br />"Thjesht filluam të gdhendnim. E shohim për së largu, krijojmë idenë, dhe pastaj gdhendim. Nuk ka master plan këtu. Kështu shkon, me dorë të lirë", tha Xhon Alberga, skulptor amator.<br />"Kjo është një mënyrë fenomenale e clirimit të stresit. Sapo i fut duart në rërë, të gjitha problemet e botës zhduken", theksoi Arti Knap, Skulptor amator.<br />Skulpturat e rërës do të gjykohen nga një panel të cilët do të zgjedhin krijimin e parë, dytë dhe i tretë më të mirë të çdo kategorie. Fituesve do t'u jepen shpërblime në para, nga 400 $, 200 dhe 100 $. Admir Qose
