TIRANË - Kërkesa e ministrit të Drejtësisë Nasip Naço për shkarkimin e 10 gjyqtarëve nuk do të jetë në rendin e ditës në mbledhjen e të premtes në Këshillin e Lartë të Drejtësisë.<br /><br />Burime nga KLD thanë për Report TV se mbledhja është planifikuar të mbahet të premten në orën 10:00 dhe do të drejtohet nga presidenti Bujar Nishani, i cili është dhe kryetari i këtij Këshilli.<br /><br />Një javë më parë më 25 shtator Ministri i Drejtësisë me një letër publike i kërkoi KLD-së të procedoj me shkarkim 10 gjyqtarë të cilët sipas ministrit kanë shkelur ligjin, kanë fshehur pasuriët dhe janë në procese gjyqësore për korrupsion.<br /><br />Por përse është refuzuar kjo kërkesë?<br /><br />Report TV ka mundur të mësojë se gjatë përgatitjes së rendit të ditës, nga administrata është vlerësuar se në kërkesën e ministrit mungonin argumentet juridike për të cilët kërkohet shkarkimi i çdo gjyqtari.<br /><br />Ende nuk dihet nëse ministri Naço do të jetë i pranishëm apo jo në mbledhjen që mbahet të premten, ku në rend të ditës do të ketë një sërë vlerësimesh për gjyqtarë dhe do të diskutohet dhe mbi punën e inspektorëve të vetë Këshillit të Lartë të Drejtësisë.
