Moti i keq me shi të dendur dhe stuhi të forta ere ka shkaktuar përmbytje kryesisht në jug. Situata më problematike paraqitet në qytetin e Vlorës. Disa nga lagjet dhe rrugët kryesore të qytetit janë mbuluar totalisht nga uji. Shumë banesa dhe biznese janë përmbytur, ndërkohë që nga moti i keq është shkëputur energjia elektrike në qytet dhe shumë fshatra përreth.<br /><br />Si pasojë e shiut të rrëmbyeshëm është bllokuar nga rrëshqitja e dherave aksi Radhimë-Orikum. Masive të mëdha guri kanë rënë mbi rrugë, duke shkaktuar bllokimin e saj.<br />Po ashtu situata e rëndë ka prekur edhe qytetin e Fierit, ku lumi Gjanica ka dalë nga shtrati, duke përmbytur banesa, lokale, dyqane të ndërtuara afër tij. Ndërkohë në disa lagje është ndërprerë energjia elektrike.<br /><br />Si rezultat i reshjeve janë përmbytur lagjet "24 Maji", "Pavarësia" dhe "15 Tetori". Nga ana e shërbimeve të policisë janë marrë menjëherë masa për evakuimin e 8 familjeve me rreth 25 persona nga shtëpitë që janë përmbytur në këto lagje, ku 3 prej tyre janë dërguar në Spitalin Rajonal për trajtim mjekësor.<br /><br />Sipas policisë, në disa rrugë të qytetit, si "10 Korriku", qarkullohet me vështirësi dhe se disa prej segmenteve që lidhin qytetin e Vlorës me Fierin, Orikumin dhe fshatrat përreth janë të pakalueshme si rezultat i inerteve të shkaktuara nga shirat e rrëmbyeshëm. <br /><br />Policia raporton vetëm për disa krerë bagëtish të ngordhura.<br /><br />Rreshjet e rëna kanë shkaktuar problem edhe në Skrapar, ku Ura e Kashabashit rrezikon të shëmbet, pasi njëra këmbë e saj është shkatërruar plotësisht. Përmbytje ka edhe në qendër të Skraparit, ndërsa ka patur rrëshqitje dherash në aksin Corovodë-Potom.
