TIRANE - Moratorium i gjuetisë i cili mbyllet në muajin mars, duhet të shtyhet me të paktën 5 vit. Kështu shprehet në një intervistë për Report Tv drejtori i Agjencisë së Zonave të Mbrojtura Zamir Dedej i cili njëherësh bën thirrje që të denoncohen rastet e gjuetisë së paligjshme.<br /> <br />"Jam që të vazhdojë kjo punë dhe për 5 vjet dhe kam përshtypjen që qeveria është në tratativa për ta vazhduar këtë moratorium. Modeli që duam të japim është që sot për gjuetinë fitojnë pak njerëz", thotë Dedej.<br /> <br />Dedej thotë se vetëm denoncimi me foto në rrjetet sociale nuk është i mjaftueshëm në rastet e gjuetisë së paligjshme pasi duhet që denoncuesit të japin të dhëna edhe për vendin apo personat e mundshëm që e kryejnë këtë veprim që më pas të bëhet edhe ndëshkimi.<br /> <br />"Shqetësimi është i drejtë, ne ndajmë me shoqërinë civile që ka bërë këto lloj denoncimesh të njëjtin mendim dhe përsa i përket pjesës së marrëdhënieve me shoqërinë civile kërkojmë që shoqëria civile përveçse denoncimit që bën në media që është e drejtë e saj të jetë pjesë e asaj lufte që ne po bëjmë çdo ditë e më shumë në terren si me administratat e zonave të mbrojtura si me inspektoratin e Mjedisit për të ndaluar gjuetinë e paligjshme", shprehet Dedej.<br /> <br />Pas denoncimeve të shumta në rrjetet sociale por edhe nga monitorimet në terren, agjencia në bashkëpunim me policinë e Shtetit kanë bërë edhe sekuestrimin e disa armëve të gjahut.<br /> <br />"Vetëm para dy javësh jashtë parkut të Divjakës rojet tona së bashku me policinë kanë bllokuar dy persona me çifte dhe që janë proceduar dhe i është sekuestruar dhe çiftja. Para disa rastesh po prapë rojet tona në zonën e Korçës dhe Pogradecit në një fotografi që ishte postuar u gjetën autorët u denoncuan në polici dhe policia i thirri për ndjekje në gjendje të lirë", - thotë kreu i Agjencisë Kombëtare të Zonave të Mbrojtura.<br /> <br />Moratorium i gjuetisë ka sjellë ndërkohë edhe shtim të kafshëve e shpendëve duke u bërë kështu edhe një atraksion për turistët e huaj.
