Valentine's Day ghazal 'husn-e-naaz' <br />حُسنِ ناز <br />لَب تِرے جامِ اَنگبِیں نِکلے <br />اَنگ پَیکَر کے مَرمرِیں نِکلے <br />اُف! نَشیب و فَرازِ پَیراہَن <br />دِل سے بَس حَرفِ آفرِیں نِکلے <br />ایک پَل کا فُسُوں نِگاہوں کا <br />پِھر تِرے سِحر سے نَہِیں نِکلے <br />کِتنے گُلرَنگ تھے سِتَم جاناں <br />زَخمِ دِل بھی شَفَق جَبِیں نِکلے <br />تیرے پَہلُو میں جی لئے اِک پَل <br />اَب یہ حَسرَت کہ دَم وَہِیں نِکلے <br />دِل فَروزاں تھی ہَر اَدا تیری <br />تیرے سَب غَم بھی دِلنَشِیں نِکلے <br />اُں کے خُطبوں میں رَنگِ حَرفِ اَماں <br />گَھر سے اَوزارِ آتِشِیں نِکلے <br />سَب ہی سوداگرانِ حِفظِ چَمَن <br />پاسداروں کے ہَم نَشِیں نِکلے <br />پِھر قَدَم اُن کے دَںدَناتے ہیں <br />اَپنے پَیروں تَلے زَمِیں نِکلے <br />پا گئے عَدل وہ دُکانوں سے <br />ہَم تھے نادان، وہ ذہیں نِکلے <br />سَب حقیقت ہے یا فریبِ نظر <br />کُچھ تو اَب قابِلِ یقیں نِکلے <br />دَم بَخُود دیکھتا رہا یزداں <br />جَب اہرمن کے مہ جَبِیں نِکلے <br />کِس تَمَسخُر سے دیکھتی ہے صبا <br />اَرضِ خاکی پہ اَہلِ دیں نِکلے <br />ہَم تو کاغذ پہ شعر لِکھتے تھے <br />رُک کے دیکھا تو نازنِیں نِکلے <br />نام اُس حُسنِ ناز کے یہ غَزَل <br />سَب حَسِینوں میں جو حَسِیں نِکلے <br />کَہکَشاؤں میں جھانکتے ہیں عقیلؔ <br />کاش پریوں کی سَر زَمِیں نِکلے
