Sot rreth 34 mijë anëtarë të PS në katër qarqe votojnë për zgjedhjet e 336 delegatëve të cilët do të përfaqësojnë bazën e Partisë Socialiste në qarqet: Korçë, Elbasan, Fier dhe Berat, në Kongresin që do të mbahet në muajin mars. <br /><br />Procesi zgjedhor i 1500 delegatëve të cilët do të përbëjnë Kongresin Zgjedhor të PS-së do të zhvillohet për tre të shtuna rresht, duke filluar nga kjo e sotmja do të ketë votim ku është i ftuar çdo anëtar i PS-së. Katër qarqe do të votojnë sipas parimit "një anëtar një votë" gjatë kësaj dite, përkatësisht qarku i Korçës, Elbasanit, Fierit dhe Beratit.<br /><br />Anëtarët e partisë në njësitë përkatëse kanë pasur mundësi të marrin pjesë në votim që nga ora 8 e mëngjesit.<br /><br />Në zgjedhjet e ditës së sotme konkurojnë afro 1000 kandidatë për delegatë të Kongresit të propozuar nga anëtarësia e partisë e 23 bashkive në përbërje të të cilave janë 151 njësi administrative. Sipas kritereve të përcaktuara në Asamblenë e muajit korrik, 50 për qind e kandidaturave janë femra dhe një e treta e tyre janë të moshës 18-25 vjeç.<br /><br />Partia Socialiste e Tiranës dhe Durrësit do të votojë në 20 shkurt, ndërsa Shkodra, Lezha, Kukësi dhe Dibra do të votojnë në 27 shkurt.<br /><br />Në këtë proces do përfshihen 122 mijë anëtarë të 12 qarqeve të Shqipërisë.<br /><br />Vetë kryeministri Rama ka monitoruar procesin e votimit në Fier e Elbasan duke parë nga afër votimet që kanë bërë anëtarët.
