TIRANE - Shoferi i Ministrisë së Brendshme Viljon Cakollari ruhet me një patrullë policie në spital nga frika e hakmarrjes ndaj vëllait të tij i cili është dënuar për një vrasje në vitin 1998.<br /><br />Pak ditë pas atentatit me armë poshtë banesës së tij në rrugën "Irfan Tomini" nga autorë ende të paidentifikuar, familjarët mohojnë që Cakollari apo i vëllai i tij që ndodhet në burg, të kenë pasur kërcënime, siç u pretendua më parë.<br /><br />Ata akuzojnë se gjykata e ka dënuar në mënyrë të padrejtë, pasi sipas tyre Laurent Cakollari nuk është përfshirë në vrasjen e vitit 1998. <br /><br />Ndërkaq në spitalin e Traumës në kryeqytet një patrullë policie e komisariatit nr.3, mban në mbikëqyrje dhomën ku qëndron shoferi i Parkut të Ministrisë së Brendshme. Efektivët e policisë verifikojnë dhe mbikëqyrin çdo person të dyshimtë që lëviz në reanimacion, apo jashtë tij. <br /><br />Policia po vijon verifikimet e saj, ndërsa mësohet se janë shoqëruar deri më tani rreth 15 persona, veç dëshmitarëve në vendin e ngjarjes. <br /><br />Dyshimet e policisë vijojnë të mbeten tek pista e hakmarrjes që ka lidhje me vrasjen e Adriatik Banos nga vëllai i Cakollarit, ndonëse familja dhe të afërmit mohojnë që ata të kenë pasur konflikte me këtë familje.
