Gazetari i njohur i Ekonomisë në Shqiptarja.com, Genc Kondi, e sheh si një masë lehtësuese për investitorët dhe ekonominë, uljen e normës bazë të interesit nga Banka e Shqipërisë. I ftuar në studion e Report Tv, ai thekson se kjo përpjekje nuk po jep rezultate pozitive që të përkthehet në rritjen e qarkullimit të parasë dhe për rrjedhojë edhe në nxitjen e investimeve.<br /><br />"Qëllimi i kësaj mase është të lehtësojë Bankat që të japin kredi dhe t'i japë një spunto ekonomisë. Pra, jep një mundësi të mirë për të dhënë kredi. Kjo masë e Bankës së Shqipërisë, çon edhe në uljen e normës së kredisë. Ajo që po vëmë re është se, janë kryer 13 ulje të njëpasnjëshme të normës së interesit nga BSH, që nga 2011-a, pra në 5 vjet kjo. Mund të ndodhte edhe më shumë, ose kjo shifër mund të ishte arritur më përpara po të mos kishim ato rezervat e mëdha të Këshillit Mbikëqyrës. Madje edhe në mbledhjen e sotme, sipas burimeve të brendshme, Këshilli Mbikëqyrës ka patur qëndrime të ndara për uljen e normës së interesit. Problemi është se kemi arritur një rekord negativ, dhe rezultati i kësaj është se konsumi në Shqipëri vazhdon të jetë i ulët. Ky konsum i ulët e mban inflacionin të ulët. Ndryshe nga sa mendojmë se na interesojnë çmimet e ulëta, ai duhet të jetë nga 2-4%, aktualisht e kemi 0.2% dhe jemi në prag të deflacionit. Kjo sjell një efekt zinxhirë në ekonominë prodhuese me efekte negative", u shpreh Kondi.<br /> <br />Duke shpjeguar vendimin e Këshillit Mbikëqyrës të Bankës së Shqipëri, ai theksoi se efektet negative bien mbi bonot e thesarit, ku ulja e normës së interesit, ngrin paratë.<br /><br />"Nga vendimi i BSH, ulet përqindja që duhet të paguajë një shqiptar për kredinë që ka marrë, ose kreditë e reja që do të jepen me interes të ulët, së dyti bonot e thesarit që kishin një normë me 10%, tani me një normë kaq të ulët paratë do të ngrijnë sërish. As bono thesari, për të çuar lekë në shtet, nuk kanë interes se kanë mbërritur në 1.5% deri në 1.6%. Kohët e fundit është vënë re edhe tërheqja e kursimeve nga shqiptarët", theksoi ai.<br /> <br />Sipas Kondit, në kushtet e uljeve drastike të normës bazë të interesit, shteti duhet të gjejë mënyrat e tjera, pasi sipas tij, nuk është vetëm detyrë e Bankës së Shqipërisë, që të joshë shqiptarët për të investuar në ekonominë e tyre.<br /> <br />Edhe pse nuk e mohon që norma bazë e interesit mund të ulet sërish, duke bërë një prognozë të situatës ekonomike në vijim, Kondi theksoi se Fondi Monetar Ndërkombëtar dhe Banka Botërore, janë shprehur për rritje ekonomike.<br /><br />"Kjo mund të shkojë edhe më poshtë se kaq, por varet nga zhvillimi ekonomik. Për këtë janë edhe mendimet e FMN-së e BB-së që kanë dhënë nota optimiste për zhvillimin nga 2016-a e në vijim, pasi u shlye mali me borxhe. Por, përsa kohë është arritur një spostim i problemeve, nëse hapen vende të reja pune, vijnë investime si TAP dhe nëse rritja ekonomike arrin në 3% në vit sipas parashikimeve, mund të kemi një masë në krah të kundërt", theksoi më tej gazetari i Ekonomisë në Shqiptarja.com, Genc Kondi.
