Mbledhja e grupit parlamentar të Partisë Socialiste është shoqëruar sot me debate mes kryetarit të grupit parlamentar, Gramoz Ruçi dhe deputetit Ben Blushi.<br /> <br />Burime thanë për Shqiptarja.com se Blushi ka kërkuar t'i vihen në dispozicion materialet zgjedhore të referendumit. Ai ka ngritur dyshimet se rezultati është i stisur dhe se kutitë e votimit janë mbushur.<br /> <br />Por përgjigja i ka ardhur menjëherë nga kryetari i grupit parlamentar socialist, Gramoz Ruçi i cili i ka kërkuar Blushit që të bëjë një kërkesë zyrtare komisionit zgjedhor të partisë. Sipas tij, grupi parlamentar nuk është përgjegjës për materialet zgjedhore.<br /> <br />Debate në mbledhjen e grupit parlamentar ka patur edhe për punën e ministrave të qeverisë "Rama".<br /> <br />Ka qenë Erion Braçe ai që ka kërkuar nga ministrat se duhet të mbrojnë në parlament punën e tyre përballë opozitës.<br /><br />"Ministrat duhet të jenë të pranishëm në Kuvend gjatë seancës. Ne mbrojmë punën e ministrave në Kuvend, ata mungojnë. Dhe jo të vijnë në Kuvend vetëm kur vjen kryeministri se kur është ai vetë, ju jeni rehat në sallë", ka deklaruar Braçe.<br /> <br />Nga ana tjetër, kryetari i grupit parlamentar të PS, Gramoz Ruçi ka urdhëruar ministrat që asnjë prej tyre të mos mungojë gjatë seancës së Kuvendit.
