Është arrestuar në Holandë Arben Frroku, vëllai i ish deputetit Mark Frroku, i dënuar nga Gjykata e Apelit të Krimeve të Rënda me burgim të përjetshëm për vrasjen e kryekomisarit, Dritan Lamaj, në 24 shkurt të vitit 2013. <br /><br />Frroku ishte në kërkim prej 9 muajsh, pas vendimit të Gjykatës së Apelit të Krimeve të Rënda që rrëzoi atë të shkallës së parë, e cila e shpalli të pafajshëm. <br /><br />Frroku është ndaluar nga policia gjatë një kontrolli në provincën Shiphol të Amsterdamit, ndërsa është prezantuar me identitet të rremë.<br /><br />Pranë autoriteteve holandeze, Frroku ka dorëzuar një dokument grek me emrin Renato Tsepa. <br /><br />Nga autoritetet holandeze ai akuzohet për vënie në përdorim të dokumentave dhe identiteteve të falsifikuara.<br /><br />Ndërkohë, Interpol Tirana prej disa muajsh ka lëshuar edhe një urdhër arresti ndërkombëtar për të.<br /><br />Identifikimi i Frrokut është bërë përmes komunikimeve të Interpol Hagës me atë të Tiranës, ku janë shkëmbyer të dhënat rreth identitetit të Frrokut.<br /><br />Dhe nga të dhënat e shkëmbyera ka rezultuar se i ndaluari është Arben Frroku, i dënuar nga drejtësia shqiptare për vrasjen e kryekomisarit Dritan Lamaj.<br /> <br />Pritet që brenda pak ditësh, Arben Frroku të ekstradohet në Shqipëri. <br /><br />Arben Frroku u lirua nga Gjykata e Krimeve të Rënda në datën 4 prill 2015. Me këtë vendim nuk u pajtua organi i akuzës. <br /><br />Prokurorët e çështjes e ankimuan vendimin e shkallës së parë në Gjykatën e Apelit të Krimeve të Rënda dhe kërkuan dënim maksimal.<br /><br />Ka qenë Apeli i cili ka rrëzuar vendimin e Gjykatës duke e dënuar Arben Frrokun me burgim të përjetshëm për vrasjen e kryekomisar Dritan Lamajt. <br /><br />Ndërkohë, një javë përpara vendimit të Apelit, Arben Frroku ishte arratisur nga Shqipëria pa lënë gjurmë as në sistemin TIMS.<br /><br />Pas dhënies së vendimit nga Apeli, ai u shpall në kërkim ndërkombëtar.<br /><br />Madje, gjatë arratisë, Frroku është ndaluar në kufirin mes Malit të Zi dhe Kroacisë dhe është lënë i lirë pas verifikimit se nuk rezultonte në kërkim.<br /><br />Gjatë kohës që ishte në arratisje, në 8 korrik të vitit 2015, Frroku bëri rekurs në Gjykatën e Lartë ku kërkoi pafajësinë.
