Policia e Elbasanit, arrestoi në të gdhirë të ditës së enjte 3 personat që dyshohet se sulmuan një grup të njësisë operacionale të Policisë së Shtetit në Elbasan si dhe 5 bashkëpunëtorë. Ardian Çapja, Florenc Çapja, si dhe Bledar Muça, u arrestuan nga policia e Elbasanit në flagrancë si të dyshuar për sulmin me armë ndaj policisë, mbrëmjen e të mërkurës.<br /><br />Të tre personat akuzohen për vrasje të mbetur në tentativë ndaj punonjësve të policisë, vrasje në rrethana cilësuese në bashkëpunim, si dhe mbajtje pa leje të armëve e municioneve luftarake.<br /><br />Ndërkohë, Bledar Muça dhe Florenc Çapja ishin objektiv i një sulmi me armë tre ditë më parë po në qytetin e Elbasanit, ku si pasojë mbeti i plagosur Muça. <br /><br />Gjithashtu, janë arrestuar edhe shtetasit Ambri Sinakoli, Fiqeret Meçe, Kastriot Peqini, Serxho Hakilja dhe jetmir Shehu, të akuzuar për veprime që pengojnë zbulimin e së vërteteës. Tashmë për këtë dosje, policia e Elbasanit, ka shpallur moskompetencën dhe dosja tashmë pritet të kalojë për hetim në prokurorinë e krimeve të rënda. Gjatë kontrollit të kryer në banesat e të dyshuarve si dhe në ambientet e brendshme të hotel Universit në Elbasan, janë sekuestruar 4 automjete, 2 automatike, 4 pistoleta fisheke e kapsolla, celularë si dhe 5 mijë euro.<br /><br />Ndërkaq saktësohet se efektivët e njësisë operacionale që kanë qenë në rol vëzhgimi me mbulim, janë sulmuar në mënyrë të papritur nga pjestarë të familjes Çapja dhe të afërm të tyre. Në këtë moment, efektivët e policisë që ndodheshin në mjetet e vëzhgimit, kanë dalë nga mjetet dhe janë identifikuar se ishin efektivë policie, ndërsa kishin të veshur jelekë dhe shenja identifikuese.<br /><br />Pavarësisht kësaj, efektivët janë gjendur sërish në breshëri plumbash, çka ka bërë që ata të reagojnë. Një grup i Forcave të Ndërhyrjes së Shpejtë mbërriti menjëherë në vendin e ngjarjes, duke shoqëruar dy persona,e më pas duke kontrolluar hotelin. Kontrollet e policisë dhe kërkimet e saj kanë vijuar për gjatë gjithë natës për të gjetur dhe arrestuar pesona të tjerë të dyshuar si të përfshirë në sulmin me armë ndaj policisë.<br /><br />Bledar Muça dhe Florenc Çapja, u bënë pre e një atentati tri ditë më parë në Elbasan, kur persona të panjohur qëlluan ndaj tyre. Nga të shtënat, mbeti i plagosur lehtë Muça dhe një kalimtare e rastit, ndërsa Çapja i shpëtoi atentatit. <br /><br />Tre muaj më parë, familja Çapja ra pre e një sulmi me armë pranë hotel "Univers" në pronësi të tyre, ku si pasojë mbetën të vdekur Agron Çapja, nipi i tij Ardit Sinakoli dhe Eno Bedalli, mik i familjes.<br /><br />Dyshimet e para u ngritën për vazhdimësinë e hakmarrjes mes fiseve Mema e Çapja, por Policia e Prokuroria asnjëherë nuk e konfirmuan këtë pistë.
