Dy ditë pas vdekjes së 25 vjeçarit Flamur Sulaj nga Miloti, në qelinë e burgut të Shënkollit i përfshirë nga flakët, flasin familjarët e tij.<br /><br />Babai i viktimës, Nuredin Sulaj në një intervistë për Report Tv thotë se djali i tij është vrarë qëllimisht.<br /><br />Teksa familja ka hapur dyert e mortit prej ditës së djeshme, ai mohon që 25 vjeçari të ketë pasur probleme mendore, siç janë shprehur burime pranë burgut të Lezhës, ndërsa i bën thirrje autoriteteve shtetërore që të zbardhin ngjarjen, pasi siç thotë ai, në mungesë të drejtësisë nga shtetit shqiptar, do t'i drejtohet Gjykatës së Strasburgut. <br /><br />"Djali im është vrarë qëllimisht, nuk ka patur probleme mendore siç pretendojnë. I kërkoj shtetit që të zbardhë ngjarjen, pasi djalin ma morën të gjallë dhe ma sollën të vdekur. Unë do e kërkoj të drejtën deri në Strasburg", u shpreh Nuredini. <br /><br />Edhe vëllai i Flamurit, Agron Sula kërkon zbardhjen e ngjarjes pasi siç shprehet ai ajo që ndodhi brenda burgut është një ngjarje shokuese dhe mjaft e rëndë. <br /><br />Flamur Sulaj, 25 vjeç, nga Miloti, humbi jetën në burgun e Shënkollit si pasojë e flakëve që përfshinë qelinë e tij. Ai u gjet i asfiksuar në banjon e dhomës. Institucionet përgjegjëse ende nuk kanë një version përfundimtar së kësaj ngjarje të rëndë e cila gati përfundoi në kufijtë e një tragjedie.<br /><br />Dyshimet janë për një sherr mes të burgosurve, ndërsa nuk përjashtohen as problemet e shëndetit mendor të 25 vjeçarit. Të plagosur mbetën dhe 9 të burgosur.
