Muharem Rama ka fituar zyrtarisht bashkinë e Dibrës. Kandidati i koalicionit Aleanca për Shqipërinë Europiane (ASHE) fitoi me një diferencë të thellë prej 4 160 vota ndaj kandidatit të djathtë të Aleancës Popullore për Punë dhe Dinjitet (APPD), Sherefedin Shehu. <br /><br />Në përfundim të numërimit të 118 kutive të votimit në KZAZ nr.19 në Dibër, rezultoi se Muharem Rama ka marrë 18 597 vota, ndërsa Shehu mori 14 435 vota. Numërimi i votave zgjati rreth 19 orë dhe u shoqërua i qetë e pa incidente.<br /><br />Muharem Rama ka arritur që të fitojë edhe në disa nga bastionet e Partisë Demokratike. Pas thellimit të diferencës, përfaqësuesit e PD janë larguar nga KZAZ nr.19. I vetmi që ka uruar kandidatin socialist ka qenë Aldo Bumçi i PD. ?<br /><br />Surprizë ishte rënia e PD në bastionet e saj, pasi Muharem Rama ka arritur që të fitojë thellë në disa prej tyre. Maqellara, njësi e cila njihet si bastion i fortë i demokratëve, sërish është fituar nga e majta. Edhe një vit më parë kur kandidonte Ilir Krosi, demokratët humbën në këtë njësi me një diferencë prej 34 votash në favor të kandidatit socialist, Shukri Xhelili. Ndërsa Rama e thelloi diferencën në 588 vota. <br /><br />Ndërkohë, Sherefedin Shehu ka humbur edhe në fshatin e tij të lindjes, Sllovë. Në përfundim të numërimit, Shehu ka rezultuar me 25 vota më pak se rivali i tij, Muharem Rama. <br /><br />Muharrem Rama ka fituar në Maqellarë, Luzni, Sllovë, Zall Reç, Zall Dardhë, Muhur, Lurë, Kastriot, Arras, Fushë Cidhen, Selishtë, Melan, Peshkopi dhe Tomin, ndërsa Shehu ka fituar vetëm në Kalanë e Dodës.<br /><br />Procesi i numërimit u transmetua live nga Report Tv, nga grupi i xhirimit, ndërsa gazetari Arsen Rusta raportoi dinamikën e shifrave kohë pas kohe.
