Një 26-vjeçar nga fshati Trush i Shkodrës ka mbetur i vdekur, pasi u qëllua me armë zjarri në fshatin Torovicë të Lezhës.<br /> <br />Ngjarja është regjistruar rreth orës 5:00 të mëngjesit në aksin e vjetër rrugor të kufirin ndarës me Shkodrës, ndërsa viktimë e kësaj ngjarje ka mbetur Ajet Qokthi.<br /> <br />Ky i fundit po lëvizte si pasagjer në një kamionçinë së bashku me kushëririn e tij Agron Qokthi, kur janë qëlluar me breshëri automatiku nga persona ende të paidentifikuar.<br /> <br />Autoret të cilët mendohet se kanë qenë të paktën dy i kanë zënë pritë në një kthese në zonë të pabanuar mjetit me të cilin po lëviznin kushërinjtë Qokthi dhe kanë qëlluar me breshëri automatiku.<br /> <br />Mjeti është qëlluar me armë në lëvizje, ndërsa nga të shtënat fillimisht ka mbetur i plagosur rëndë 26-vjeçari i cili ka ndërruar jetë vetëm pak minuta më vonë.<br /> <br />Sipas të dhënave trupi i viktimës është përshkuar nga dy plumba të cilët i kanë marrë edhe jetën.<br /> <br />Nga të shtënat fatmirësisht drejtuesi i mjetit nuk është lënduar, ndërsa ka qenë vete ky i fundit që ka njoftuar policinë dhe banorë të zonës në lidhje me ngjarjen.<br /> <br />Banorët thonë se policia dhe ambulanca kanë vonuar më shumë se 1 orë e 30 minuta për të mbërritur në vendin e ngjarjes, duke deklaruar se po t'i ishte dhënë ndihma e parë në kohë 26-vjeçari edhe mund të kishte shpëtuar.
