محسن فكري، (31 عام)، مواطن مغربي بسيط من الحسيمة، كيبيع الحوت و كيعيل بيه أسرة مكوّنة من عشرة د النّاس.<br /><br />البارح بالليل، مصالح البلدية و البوليس خداو ليه سلعتو كان يالله جابها من المرسى، خمسة طن ديال الحوت من نوع Spada بوسيف حطّ فيها گاع راسمالو، ناضو لاحوها ليه فالكاميو ديال الزبل.<br /><br />السيّد أمام هول الصدمة، تلاح فالكاميو باش يجبد رزقو و الناس كا تشوف، الشيفور ديال الكاميو سمع أمر من بوليسي (ما بغاش محسن يعطيه رشوة ديال 500 درهم) كيقول ليه #طحن_مّو.<br /><br />محسن كيف ما كتشوفو، هاهو مطحون مع الحوت ديالو، تْقتل بدم بارد بدون رحمة، و خلاّ عائلة بدون مُعيل.<br /><br />الشعب فالحسيمة خرج البارح عن بكرة أبيه للشواريع كيحتج و يغوّت و يتضامن مع شهيد الحگرة محسن فكري، ألاف د الناس إعتصموا أمام ولاية الأمن و مندوبية الصيد الليل كامل حتّى جا عامل الإقليم و الوكيل العام للملك مع الثلاثة دالصباح باش يتفاوض معاهوم و يسمع ليهم.<br /><br />تحية لشعب الريف، تحية للناس دالحسيمة واخا صوّتوا لعميل المخزن العمّاري، و هاد السيّد ما خاصش الموت ديالو تنسا كيف ما تنسا الموت ديال شهيدة الحگرة مّي فتيحة فالقنيطرة
