Në 21 Gusht të këtij viti, Nelgert Patës, i cili u vra tre muaj më pas në Zhupan të Fierit, iu bë një atentat pranë 21 Dhjetorit në Tiranë.<br /><br />Televizioni Klan ka siguruar pamjet e këtij atentati, ku Pata mbeti i plagosur lehtë. Pamjet janë regjistruar nga kamerat e sigurisë së një biznesi pranë vendit të ngjarjes, ku duket se si Pata është qëlluar me një armë zjarri, që dyshohet të ketë qenë me silenciator.<br /><br />Në pamje shihet se si 34 - vjeçari është duke biseduar me disa miq të tij në trotuar. Persona ende të panjohur kanë qëlluar ndaj Nelgert Patës nga ana tjetër e rrugës, në momentin kur ai ishte duke iu drejtuar makinës së tij.<br /><br />Fillimisht asgjë nuk kuptohet, por vetë objektivi i atentatit arrin të largohet me shpejtësi. Më pas edhe personat e tjerë largohen në drejtim të pallatit, që ndodhet aty pranë.<br /><br />Një nga personat që shoqëronte Patën, duket teksa hap çantën e krahut, ku dyshohet se ka nxjerrë armën që mban me vete.<br /><br />34 - vjeçari Pata u vra nga persona të panjohur në 20 Nëntor. Për hetuesit, vrasja është e lidhur me serinë e hakmarrjes me bandën e Elton Çiçës, edhe ky i vrarë me 2 Maj të këtij viti në Tiranë.
