Prokuroria për Krimet e Rënda përfundon hetimet dhe dërgon dosjen për gjykim ndaj Denis Shtrazës dhe ish -oficerit të policisë, Ervin Dalipaj të akuzuar për rrëmbimin, torturimin dhe më pas vrasjen e Gazmend Çollakut në Durrës, Janarin e këtij viti. Materialet janë dorëzuar ditën e martë në Gjykatën e Krimeve të Rënda. Ish-efektivi i policisë Dalipaj vazhdon të jetë në kërkim, pasi ende nuk është arrestuar.<br /><br />Gjithashtu, ata akuzohen edhe për armëmbajtje pa leje dhe mbajtje të paligjshme të uniformës së policisë. Ata sipas Prokurorisë kanë qenë të veshur si punonjës policie, kur rrëmbyen 36 - vjeçarin Çollaku.<br /><br />Gazmend Çollaku u rrëmbye në qëndër të qytetit të Durrësit në 6 Janar. Të nesërmen ai u gjet i vdekur në fshatin Murqin të Fushë-Krujës, i ekzekutuar me dy plumba pas koke. Më parë, sipas policisë, ai ishtë keqtrajtuar nga autorët e vrasjes, pasi në trup iu gjetën shenja dhune.<br /><br />Shkak për krimin, sipas Prokurorisë, është një tentativë e Çollakut për të vrarë Shtrazën në vitin 2013 dhe konfliktet mes tyre. Në dosjen e akuzës thuhet se Shtraza dhe Dalipaj janë shoqëruar ditën e ngjarjes dhe në makinën e ish-policit janë gjetur gjurmë gjaku, të njëjta me ato që u gjetën në trupin e viktimës.<br /><br />Prokurorët thonë se dy të rinjtë japin versione kontradiktore për itinerarin e tyre dhe se nuk shpjegojnë të kujt janë 9 celularët e gjetur në makinë. <br /><br />Burime pranë Prokurorisë sqarojnë për Televizionin Klan se në hetim për këtë dosje janë edhe dy persona të tjerë. Identiteti i tyre nuk bëhet i ditur. Dosja për ta është ndarë dhe hetimi do të vazhdojë.<br /><br />Tv Klan
