Një helikopter i Forcave të Armatosura është rrëzuar këtë mërkurë rreth orës 14.00 në ujërat e Liqenit të Shkodrës, pranë fshatit Grizhë të Malësisë së Madhe. <br /><br />Në bordin e helikopterit kanë qenë 3 ushtarakë, ku 2 prej të cilëve kanë humbur jetën. Sipas Ministrisë së Mbrojtjes, viktimat janë kapiten Florian Deliaj dhe toger Donald Hoxha.<br /><br />Trupat e tyre janë nxjerrë nga Liqeni nga polumbarët e RENEA-s dhe janë përcjellë për në morgun e Spitalit Rajonal të Shkodrës. <br /><br />Nga ky aksident ka mbetur i plagosur ushtari profesionist, Gerald Baramuça, i cili ka mundur të shpëtojë. Atij i është dhënë ndihma e parë nga banorët dhe peshkatarët e zonës, të cilët e kanë transportuar menjëherë për në spitalin rajonal të Shkodrës.<br /> <br />Menjëherë pas ngjarjes, forca të shumta të Policisë si FNSH-ja dhe RENEA, zjarrfikëset si dhe autoambulancat, mbërritën në vendngjarje për të bërë të mundur<br />nxjerrjen e trupave të pajetë nga helikopteri.<br /><br />Gjithashtu, nga Tirana u nis një helikopter kërkim shpëtimi, i Forcave të Armatosura. <br /> <br />Korrespondenti i Shqiptarja.com, Elvis Nabolli i cili raportoi nga vendngjarja, deklaroi se në bregun e Liqenit të Shkodrës gjenden disa mbetje të helikopterit.<br /><br />Në vendin e rrëzimit të helikopterit ka qenë edhe një varkë peshkimi me disa peshkatarë.<br /><br />Ata kanë deklaruar se fillimisht kanë dëgjuar një zhurmë shpërthimi në bordin e helikopterit kur ai ndodhej në ajër, ndërsa më pas, pas disa avarive, ka rënë në Liqenin e Shkodrës.<br /><br />Po sipas dëshmive të tyre, në momentin e rrëzimit janë dëgjuar edhe thirrjet për ndihmë të pjesëtarëve të bordit.<br /><br />Ata kanë mundur të nxjerrin nga uji vetëm një nga pjesëtarët e bordit, ushtarin profesionit Gerald Baramuça, i cili edhe pse me plagë në trup kishte dalë nga helikopteri.<br /><br />Ndërsa për dy pjesëtarët e tjerë të ekuipazhit, ka qenë e pamundur nxjerrja, deri kur kanë mbërritur forcat e policisë dhe zjarrfikëset.
