Një tjetër përplasje mes LSI-së dhe Partisë Socialiste ka ardhur kësaj radhe për ligjin e amnistisë gjatë diskutimit në komisionin e ligjeve.<br /><br />Shkak u bë një propozim i deputetit Ulsi Manja, për të falur të gjithë ata persona të dënuar me vendim të formës së prerë deri në 12 dhjetor të këtij viti për veprat penale si ndërtimet pa leje dhe vjedhje të energjisë elektrike.<br /><br />Socialistët propozuan që pjesë e amnistisë të jenë edhe ata persona që janë në hetim apo gjykim për këto vepra penale që kanë ndodhur përpara datës 30 nëntor të 2016. Bashkë më këtë ndryshim socialistët propozuan shtrirjen e amnistisë nga dy deri në 3 vjet.<br /><br />Përfaqësuesit e LSI-së në komision shkuan më tej kur propozuan një nen që përjashton nga amnistia të gjithë ata persona që mbajnë apo kanë një funksion publik dhe janë subjekt i ligjit të dekriminalizimit.<br /><br />Kundërshtime për ligjin pati edhe opozita.<br /><br />Projektligji për amnistinë kaloi vetëm me votat e maxhorancës në komision, por nga varianti i propozuar nga Ministria e Drejtësisë pjesë e amnistisë nuk do të jenë më veprat penale për kultivimin e lëndëve narkotike, si dhe të sëmurët me tumor.<br /><br />Tv Klan
