Prokuroria e Durrësit nuk ka dyshime se disa gjyqtarë në Durrës dhe Krujë kanë shpërdoruar detyrën në rastin e lirimit më kusht të Lulzim Berishës.<br /><br />Gjatë 1 muaj hetimi, akuza e qytetit bregdetar ka krijuar dyshime të arsyeshme se ndaj togave të zeza duhet të kryhen veprime të tjera hetimore, sa i përket vendimmarrjes së tyre.<br /><br />Për këtë arsye, Prokuroria e Durrësit ka shpallur moskompetencën. Në bazë të ligjit, ajo nuk mund të zhvillojë hetime mbi gjyqtarët e të njëjtin rreth për shkak të konfliktit të interesit.<br /><br />Dosja tashmë do të jetë në dorën e Prokurorisë së Tiranës. Pritet që prokuroria të thërrasë për të pyetur të gjithë gjyqtarët, të cilët kanë qënë pjesë e trupave gjyqësore që kanë dhënë vendime për Lulzim Berishën.<br /><br />Nga hetimet e deritanishme rezulton se praktikat e ndjekura nga Gjykata e Shkallës së Parë dhe ajo e Apelit Durrës, si dhe ajo e Krujës kanë probleme.<br /><br />Llogaritja e kohës së vuajtjes së dënimit nuk është bërë siç duhet dhe sipas Prokurorisë, Lulzim Berisha duhet të qëndronte në burg të paktën edhe dy vite e 7 muaj.<br /><br />Për këtë arsye u arrestua Drejtori i Burgut të Durrësit, Astrit Kotaj, ndërsa u shpall në kërkim juristi Tedi Labi.<br /><br />Hetime po kryehen edhe për disa zyrtarë të Bashkisë së Durrësit, me dyshimin se mund të kenë kryer veprime në kundërshtim me ligjin, me qëllim krijimin e kushteve për pranimin e kërkesës për lirim para kohe me kusht të të dënuarit, Lulzim Berisha.<br /><br />Tv Klan
