Битољану: Постои сомнеж дека ученици се користат во политички цели <br />Притисоци и закани до ученици во неколку скопски средни училишта за да ја бојкотираат наставата и да излезат на партиски протести имало во последните неколку дена. На социјалните мрежи средношколци коментираат дека биле убедувани да протестираат за не прифаќање на Платформата и политичката состојба во државата. <br /> <br />Во Битола неколку десетици ученици од средното техничко училиште „Ѓорги Наумов“ вчера ја прекинале наставата и излегле во училишниот двор на протест против двојазичноста. Тие велат дека сами се организирале бидејќи не се согласуваат со моменталната политика во државата „да учат албански јазик“, а на своите врсници им порачаа и тие да го сторат истото и да излезат на протести на Широк Сокак. Учениците кои не протестирале, останале во училишните клупи. <br /> <br />Средношколците велат дека протестите ќе продолжат и во наредните денови. Овие протести се случуваат напоредно со протестите кои се организирани од Иницијативата „За заедничка Македонија”. <br />„Постои сомневање дека младите можат да бидат искористени во политички цели. Младите треба да се занимаваат со политика, но не да туркаат политички и партиски агенди. Доколку протестираат тоа треба да биде автентичен нивен глас, да се чуе кои се незадоволствата и како да се справиме со тоа“ вели за НОВА, Ана Битољану од Првата детска амбасада „Меѓаши“. <br /> <br />Таа предупредува дека ваквата злоупотреба на децата ги тера на послушност и пасивност и ги отргнува од правото на нивно сопствено мислење. <br /> <br />„Младите треба да бидат загрижени з а низа политички прашања, впрочем и за прашањето со јазикот со нив треба да се разговара, но на адекватен начин кој нема да ги мобилизира во деструктивна насока во правец на притисок и закана“, вели Битиљану. <br /> <br />Меѓаши денеска предупреди да не се злоупотребуваат децата за учеството на протестите организирани од Иницијативата „За заедничка Македонија”. Од таму сметаат дека политичката злоупотреба на децата подразбира политичка присила и организирање на децата како инструмент за политички притисок. Целиот разговор со Ана Битољану гледајте го во недела во 16 часот во емисијата ПРОЦЕС, на НОВА.
