Komisioni hetimor për aferën CEZ pas më shumë se një orë mbledhje, nuk ka arritur të marrë dëshminë e Shkëlzen Berishës, djalit të ish-kryeministrit Sali Berisha.<br /><br />Ai ka refuzuar të bëjë betimin përpara anëtarëve të komisionit, çka sipas ligjit e bën të pavlefshme dëshminë e tij. <br /><br />Kryetari i komisionit, deputeti socialist Taulant Balla kërkoi nga dëshmitari të bënte betimin dhe të jepte gjeneralitetet, por kjo u refuzua nga Shkëlzen Berisha.<br /><br />Ky i fundit tha se deputeti socialist është në konflikt interesi për shkak të vendimit të gjykatës i cili e ka dënuar Ballën për shpifje.<br /><br />"Gjeneralitetet e mia i ke te vendimi i gjykatës i dënuar për shpifje. Nuk betohem para një të dënuari për shpifje", u shpreh Berisha. <br /><br />Nga ana e tij, Balla u shpreh se pa bërë betimin, dëshmia është e pavlefshme dhe kërkoi ndërprerjen e mbledhjes së komisionit. <br /><br />" Atëherë nëse dëshmitari nuk bën betimin, ndërpritet seanca dhe mbyllet mbledhja e komisionit", tha Balla. <br /><br />Në një prononcim për mediat jashtë komisionit, Balla tha se Sali Berisha, Shkëlzen Berisha dhe Nuel Kalaj, kanë bërë marrëveshje mes tyre për të mos dhënë informacione përpara komisionit hetimor. <br /><br />Balla tha se është detyrë e komisionit që të zbardhë se ku kanë shkuar 7 milionë eurot e tërhequra në bankë nga Nuel Kalaj, pas firmosjes së marrëveshjes së privatizimit të OSSH te CEZ-i.
