Ekspertiza mjeko - ligjore pritet të japë përfundimisht versionin zyrtar për vrasjen e dyfishtë, të ndodhur të premten në Fier.<br />Hetimet e deritanishme kanë treguar se autori i krimit është 32 - vjeçari Drini Derveni. Ai, sipas policisë, ka qëlluar me pistoletë 29 - vjeçaren Ermira Arapi, nënë e një fëmije, me të cilën kishte një lidhje intime dhe më pas është vetëvrarë.<br /><br />Por ekspertiza që përfundon të hënën, pritet të japë detaje të vlefshme për hetimin. Në pistoletën tip TT u gjetën shenjat e Dervenit, ndërsa në dorën e tij të djathtë, faktorë plotësues të qitjes.<br /><br />Dy trupat u gjetën në makinën e Dervenit.<br /><br />Ajo që ngelet e paqartë janë motivet e këtij krimi.<br /><br />Sipas policisë, dyshohet se 29 - vjeçarja mund të ketë qenë shtatzenë dhe ky ka qenë shkaku i konfliktit.<br /><br />Hetuesit kanë në dorë edhe telefonat celularë të dy viktimave, tek të cilët pritet të gjejnë të dhëna të vlefshme për motivin e ngjarjes.
