TIRANE- Dy ditë para protestës, Partia Demokratike ka shfrytëzuar seancën e kësaj të enjte për të shkaktuar tensione dhe lëshuar mesazhe kërcënuese në adresë të mazhorancës. <br /><br />Në nisje të seancës, ish-kryetarja e Kuvendit, Jozefina Topalli, kërkoi mocion mosbesimi për kryeministrin Edi Rama, duke deklaruar se qeveria ka rënë. <br /><br />I ashpër në fjalën e tij ishte edhe ish-kryeministri Sali Berisha, i cili kërkoi largimin e kryeministrit Rama nga Kuvendi, përpara se 'ta marrë sheshi më 18 Shkurt'. <br /><br />Kulmi i seancës së tensionuar arriti kur deputeti demokrat Flamur Noka qëlloi me kartonin e votimit ligjvënësin socialist, Erion Braçe, pasi ky i fundit kishte fyer ish-kryeministrin Sali Berisha. <br /><br />Shkak për përplasjen Noka-Braçe u bë pikërisht fjala e Berishës nga foltorja e Kuvendit i cili po lëshonte akuza në drejtim të qeverisë dhe mazhorancës. Punimet e seancës u ndërprenë për disa minuta, ndërsa Flamur Noka u përjashtua 10 ditë nga Kuvendi për shkelje të rregullores. Pas kesaj opozita braktisi punimet duke lënë të vetme në sallë maxhorancen.
