Policia Bashkiake ka nisur një aksion për prishjen e tregut pranë Spitalit Nr.5 në Tiranë, i cili do të zhvendoset në një hapësirë tjetër të dedikuar. <br /><br />Ky aksion i nisur në orët e para të mëngjesit të kësaj të mërkure, ka sjellë edhe përplasjen e Policisë Bashkiake me tregtarët romë. <br /><br />Sipas Bashkisë së Tiranës, tregu do zhvendoset nga ambientet pranë këtij spitali për ta lënë atë hapësirë të lirë, por ka hasur në kundërshtimin e tregtarëve, të cilët nuk pranojnë të largohen. <br /><br />Gjatë përplasjes me policinë bashkiake një prej tregtareve rome të këtij tregu ka pësuar gjendje të fikti. Asaj i është dhënë ndihma e menjëhershme mjekësore dhe ndodhet jashtë rrezikut për jetën. <br /><br />Policia Bashkiake: Tregtarët u njoftuan dy javë më parë<br />Policia bashkiake e Tiranës ka njoftuar se tregtarët romë te Spitali Nr.5 janë njoftuar dy javë më parë për zhvendosjen e tregut në datën 1 mars. <br /><br />Ndërsa dy ditë më parë janë njoftuar personalisht të gjithë tregtarët. <br /><br />"Aksioni ka nisur që në orën 5 të mëngjesit. Ju është dhënë mundësia që të lëvizin mallin nga tregu informal i Shkollës së Bashkuar dhe Rruga Kongresi i Manastirit", thuhet në reagimin e policisë bashkiake.
