Fatime Hida, 77 - vjeçarja nga fshati Mihajas i Bërzhitës në Tiranë, ka vdekur nga asfiksia e shkaktuar nga një rrobë me të cilën i ishte zënë goja.<br /><br />Një veprim i tillë mund të jetë bërë me qëllim shmangien e ndonjë mundësie të gruas për të kërkuar ndihmë. Pasi gruaja është lidhur këmbë e duar dhe bllokuar gojën, ata e kanë lënë të moshuarën në dyshemenë e shtëpisë, ku edhe ka ndërruar jetë nga mungesa e frymëmarrjes.<br /><br />Në këtë përfundim kanë mbërritur ekspertët mjeko - ligjorë pas autopsisë së kryer në trupin e të moshuarës, si dhe ekzaminimeve të tjera.<br /><br />Burime nga Drejtoria e Policisë së Tiranës thanë për Televizionin Klan se autopsia konfirmoi vdekjen e gruas për shkak të bllokimit të rrugëve të frymëmarrjes.<br /><br />Disa objekte janë sekuestruar në banesë. Ato do të ekzaminohen nga policia për gjurmë që mund të ndihmojnë hetuesit në zbardhjen e krimit.<br /><br />Hetuesit kanë vijuar me pyetjen e dëshmitarëve që mund të kenë dijeni mbi rrethanat e vrasjes së gruas apo motiveve të mundshme. Dyshimet janë se autorët mund të jenë banorë të të njëjtit fshat e madje se mund të banojnë fare pranë saj.<br /><br />Specialistët e hetimit të krimeve dyshojnë se ngjarja mund të ketë qenë një tentativë për grabitjeje e parave që mund të ketë pasur në banesë gruaja e moshuar.<br /><br />Tv Klan
